Трамп потврди: Го избрал новиот претседател на Фед

Американскиот претседател Доналд Трамп изјави дека ја донел одлуката за својот избор за следниот претседател на Федералните резерви, откако јасно стави до знаење дека очекува неговиот кандидат да обезбеди намалување на каматните стапки.

„Знам кого ќе го изберам, да“, им рече Трамп на новинарите во претседателскиот авион  на враќање во Вашингтон, без да го открие изборот. „Ќе го објавиме тоа.“

Трамп често го критикува актуелниот претседател на Федералните резерви, Џером Пауел, за тоа што не ги намалува каматните стапки доволно брзо, и сигнализира дека сака човек на чело на институцијата што поагресивно ќе се залага за намалувања. Извори запознаени со ситуацијата изјавија за „Блумберг њуз“ (Bloomberg News) минатата недела дека директорот на Националниот економски совет на Белата куќа, Кевин Хасет, главниот економски советник на Трамп, се смета за најверојатен избор за наследник на Пауел.

Хасет, во интервју во неделата за емисијата „Соочување со нацијата“ (Face the Nation) на Си-би-ес (CBS), одби да коментира дали се смета за фаворит да го замени претседателот на Фед, Џером Пауел, и го нарече извештајот „гласина“. Сепак, тој се повика на позитивната реакција на пазарите на веста дека Трамп наводно е блиску до избор на свој кандидат, што беше суптилен одговор на загриженоста дека инвеститорите би го гледале како премногу близок до претседателот.

„Имавме одлична аукција на обврзници на Министерството за финансии, каматните стапки паднаа и мислам дека американските граѓани може да очекуваат претседателот Трамп да избере некого што ќе им помогне да добијат поевтини автокредити и полесен пристап до хипотеки со пониска стапка“, изјави Хасет во интервјуто.

„Тоа го видовме во реакцијата на пазарот на гласината за мене.“

Трамп му верува на Хасет и го гледа како човек што е целосно усогласен со неговата желба за поагресивно намалување на каматните стапки во централната банка, велат добро упатените извори. Хасет изјавил дека би ја прифатил функцијата доколку му биде понудена, иако аналитичарите предупредуваат дека би можел да се соочи со тешкотии да го обедини комитетот за одлучување за каматните стапки во Федерални резерви и дека би бил поранлив на притисокот од Трамп. Неговото потенцирање на реакцијата на пазарите беше де факто одговор на тие грижи.

Иако Трамп е познат по тоа што во последен момент менува одлуки, можноста Хасет да биде номиниран накратко го спушти приносот на 10-годишните државни обврзници под 4 отсто.

Министерот за финансии Скот Бесент, кој го води процесот на избор, минатата недела изјави дека Трамп би можел да го соопшти својот кандидат пред божиќните празници на 25 декември.

Покрај Хасет, во најтесниот избор се и гувернерите на Федералните резерви, Кристофер Велер и Мишел Боуман, поранешниот гувернер на Фед, Кевин Варш, и Рик Ридер од „Блекрок“ (BlackRock). Трамп исто така често вели дека би сакал Бесент да биде претседател, идеја што Бесент постојано ја одбива.

Кого и да го избере Трамп, ќе треба да добие потврда од Сенатот за функцијата претседател и веројатно за 14-годишен мандат како гувернер на Федералните резерви, кој почнува во февруари доколку изборот биде личност однадвор. Мандатот на Пауел како претседател на Фед завршува во мај.