Бари се обложува против „Тесла“ поради високата процена на компанијата и платата на Маск

Мајкл Бари се обложи против акциите на „Тесла“ (Tesla Inc.), велејќи дека се „апсурдно преценети“ и предупредувајќи дека предложениот пакет за надомест од 1 билион долари за основачот Илон Маск дополнително ќе го зголеми намалувањето на уделите на акционерите.

Бари, најпознат по тоа што точно се обложи против американскиот пазар на недвижности во финансиската криза во 2008 година, проценува дека компензацијата во акции кај производителот на електрични возила го намалува уделот на акционерите за околу 3,6 отсто годишно, без откуп на акции што би го ублажиле ефектот. Тоа го објавил на неговата платформа Сабстак (Substack), наведува „Форчн“ (Fortune). „Тесла“ не одговорила на барањето за коментар на „Блумберг њуз“.

Потегот ја продолжува негативната позиција на Бари кон високо вреднуваните технолошки акции и го повторува неговиот претходен „шорт“ (облог) против водечкиот производител на чипови „Енвидија“ (Nvidia Inc.), каде што изнесе слични предупредувања за намалување на уделите. Во услови кога инвеститорите веќе стравуваат од можен балон во областа на вештачката интелигенција, неговата критика за начинот на компензација ги засилува тие грижи.

Bloomberg

„Тесла“ веќе е под лупа додека акционерите расправаат за предложената награда од 1 билион долари за Маск, која зависи од исполнување низа поставени  резултати. Обемот на планот и потенцијалното намалување на уделите се во фокусот на вниманието кај институционалните инвеститори што ги анализираат концентрацијата на ризик и зависноста од Маск како клучна личност.

„Норгес банк“ (Norges Bank Investment Management), најголемиот суверен фонд во светот, гласаше против пакетот, наведувајќи загриженост поради неговата големина, намалувањето на уделите и недоволната заштита од прекумерна зависност од Маск. Нивниот став покажува дека отпорот веќе не доаѓа само од отворени „шорт“ инвеститори како Бари туку и од големите управувачи со средства.

„Акциите на ‘Тесла’ се третираат како влог во високоризичен ВИ или роботакси-проект“, вели Тарек Хорчани, раководител на одделот за институционално тргување во „Мејбанк“ (Maybank Securities).

„Пазарот очигледно е нервозен поради тоа колку е преценето вреднувањето на ‘Тесла’ во однос на нејзините реални резултати. Многу работи треба да се одвиваат беспрекорно, и тоа многу брзо за да се оправда сегашното вреднување“, додава тој.

Бари, кој стана светски познат благодарение на книгата „Големото обложување“ (The Big Short), ја откри оваа трговска позиција веднаш по дерегистрацијата на неговата компанија „Скајон есет менаџмент“ (Scion Asset Management) – потег што укажува дека преку неговата платформа Сабстак (Substack), наречена „Касандра анчејнд“, сака директно да им се обраќа на пазарите и да влијае врз дебатата за вреднувањата на технолошките компании.

Акциите на „Тесла“ годинава пораснаа за 6,5 отсто, значително помалку од растот од 21 отсто на индексот Nasdaq 100, и во моментов се тргуваат по цена што е околу 200 пати поголема од добивката што се очекува компанијата да ја оствари во следните 12 месеци, покажуваат податоците на „Блумберг“.

Засега реакцијата на пазарот е умерена. Акцијата во понеделникот затвори без поголеми промени, а на алтернативната платформа за тргување „Блу оушн“ (Blue Ocean) денеска во 10:03 часот по сингапурско време беше повисока за околу 1 отсто.