Европскиот инвестициски фонд (ЕИФ), кој е дел од групацијата на Европската инвестициска банка (ЕИБ), потпиша договори за гаранција во вредност од 4,8 милиони евра. Станува збор за последниот дел од средствата на ЕУ во висина од 60 милиони евра што треба да се издвојат од гаранцијата на ЕУ, а договорите се потпишани со „Шпаркасе банка“ АД Скопје, „Шпаркасе банка“ во БиХ и „Ерсте банка“ во Подгорица.
„Овие 4,8 милиони ќе им овозможат на локалните банки да создадат ново портфолио за финансирање мали и средни претпријатија (МСП) во вкупен износ од 60 милиони евра во кредити со повластени услови во рамките на иницијативата ‘Гаранција 4 за отпорност на МСП’, олеснета од Инвестициската рамка за Западен Балкан на Европската Унија“, информираат од ЕИБ, посочувајќи дека „Ерсте и Штајермеркише банк“, со седиште во Хрватска, ќе управува со координацијата на гаранциите.
Финансирана од Европската Унија, оваа иницијатива има цел да го зголеми пристапот до поволно финансирање за МСП за да им помогне да одговорат на пазарните предизвици, да ги прошират своите бизниси и да создадат работни места. Очекувањата за Македонија се дека инструментот ќе мобилизира над 20 милиони евра во повластени кредити за околу 125 мали бизниси, додека за БиХ ќе ослободи 25 милиони евра во кредити, поддржувајќи 150 бизниси, како и 15 милиони евра во кредитни линии за сто компании во Црна Гора. Се очекува средствата да помогнат во одржувањето на околу 5.750 работни места.
„Овие гаранции ќе им овозможат на нашите партнерски банки да нудат кредити со поволни услови за бизнисите во Северна Македонија, Босна и Херцеговина и Црна Гора, со пониски каматни стапки, намалени барања за обезбедување и продолжени рокови на достасување. Оваа поддршка ќе им помогне на компаниите да ги прошират своите операции и да се приспособат на најновите случувања на пазарот, со што ќе се поттикне конкурентна и отпорна економија“, изјави Марјут Фалкстед, извршна директорка на ЕИФ.
Според комесарката за проширување Марта Кос, потпишувањето на овие нови гаранциски договори означува уште еден важен чекор во продлабочувањето на партнерството на ЕУ со Западен Балкан. „Со 4,8 милиони евра поддршка од ЕУ, овие гаранции ќе отклучат до 60 милиони евра повластени кредити, значително подобрувајќи го пристапот до прифатливо финансирање за микро, мали и средни претпријатија во Северна Македонија, Босна и Херцеговина и Црна Гора. Оваа иницијатива директно ги поддржува целите на механизмот за реформи и раст за Западен Балкан, помагајќи им на бизнисите да растат, да создаваат квалитетни работни места и да ја зајакнат конкурентноста на регионот. Преку таква опиплива, насочена поддршка ја унапредуваме економската отпорност и го доближуваме Западен Балкан до неговата европска иднина“, изјави Кос.
Европска инвестициска банка
„Многу сме задоволни што имавме можност да управуваме со координацијата на гаранцијата за отпорност на мали и средни претпријатија од Западен Балкан 4 во рамките на шемата Чадор, олеснета од инвестициската рамка за Западен Балкан на Европската Унија“, изјави Кристоф Шофбек, извршен директор на „Ерсте и Штаермеркише банк“. „Со нашето добро втемелено искуство и знаење, поткрепени со долгорочна и успешна соработка помеѓу ’Ерсте банка’ од Хрватска и групацијата ЕИБ, со нетрпение очекуваме да ги поддржиме нашите колеги во Северна Македонија, Босна и Херцеговина и во Црна Гора и да им обезбедат на своите клиенти поповолни услови за кредитирање. Веруваме дека малите и средните претпријатија се столбот и важните двигатели на економскиот развој. Затоа, убедени сме дека таквата шема за портфолио-финансирање ќе придонесе за нивна посилна и поотпорна конкурентност на локалните пазари“, рече Шофбек.
Откако во ноември 2022 година беше лансирана гаранцијата за отпорност на мали и средни претпријатија за Западен Балкан 4, ЕИФ во партнерство со Европската комисија потпиша договори за гаранција со 18 финансиски институции низ регионот, отклучувајќи вкупно 886 милиони евра во кредити со поволни услови за кредитирање, за кои се очекува да поддржат 15.000 компании и да обезбедат 140.000 работни места во Западен Балкан.
Европска инвестициска банка
Како дел од групацијата на Европската инвестициска банка, Европскиот инвестициски фонд ги поддржува малите и средните претпријатија во Европа преку подобрување на нивниот пристап до финансии преку широк спектар на избрани финансиски посредници. ЕИФ дизајнира, промовира и имплементира инструменти за финансирање со капитал и долг насочени кон МСП. Во оваа улога, ЕИФ ги поттикнува целите на ЕУ во поддршка на претприемаштвото, растот, иновациите, истражувањето и развојот, зелените и дигиталните транзиции и вработувањето. Групацијата ЕИБ, која го вклучува и ЕИФ, потпиша речиси 89 милијарди евра ново финансирање за над 900 проекти со големо влијание во 2024 година, зголемувајќи ги конкурентноста и безбедноста на Европа.
Сите проекти финансирани од групацијата ЕИБ се во согласност со Парискиот договор за климата. Речиси 60 проценти од годишното финансирање на групацијата ЕИБ поддржуваат проекти што директно придонесуваат за ублажување на климатските промени, адаптирање и поздрава животна средина. Поттикнувајќи интеграција на пазарот и мобилизирање инвестиции, групацијата лани поддржа рекордни над 100 милијарди евра нови инвестиции за енергетската безбедност на Европа и мобилизира 110 милијарди евра капитал за раст за стартапи, растечки компании и европски пионери. Приближно половина од финансирањето на ЕИБ во рамките на Европската Унија е насочено кон кохезиски региони, каде што приходот по жител е понизок од просекот на ЕУ.
.webp){kind=icon}
Во моментов нема коментари за веста. Биди прв да коментира...