Агенцијата за кредитен рејтинг „Фич“ (Fitch Ratings) го потврди кредитниот рејтинг на Македонија на нивото „BB+“ со стабилен изглед, што претставува јасен сигнал за доверба во економските политики и макроекономските перспективи на земјата, соопшти Министерството за финансии.
Во најновиот извештај, „Фич“ ја нагласува важноста на доследните и кредибилни макроекономски политики, како и долгорочната определба за фиксен девизен курс, како клучни фактори кои придонесуваат за стабилноста на економијата. Покрај тоа, позитивно се оценети и подобрените индикатори за владеење во споредба со други земји со сличен рејтинг.
Според податоците, економијата на земјата пораснала за 3,2 проценти во првата половина од 2025 година, при што главни двигатели биле приватната потрошувачка и растот на извозот. Очекувањата на „Фич“ се дека ваквото темпо ќе продолжи, со проектиран годишен раст од 3,2% за 2025 година, и просечен раст од 3,4% за периодот 2026–2027 година – што е над долгорочниот просек од 3%.
Како дополнителен поттик за растот, се наведуваат големите инфраструктурни проекти, кои ќе го зголемат инвестициониот потенцијал и ќе придонесат кон подобро економско поврзување со пазарите на Европската Унија. Истовремено, евроинтеграцискиот процес е препознаен како стабилизирачки фактор кој го поддржува спроведувањето на структурни реформи и институционално јакнење.
Иако се очекува благо намалување на странските директни инвестиции по рекордните 7% од БДП во 2024 година, тоа, според извештајот, се должи на ограничувањата на пазарот на труд и глобалните ризици во автомобилската индустрија.
Како предизвици за среднорочен развој, „Фич“ ги идентификува негативните демографски трендови и ниската продуктивност. Воедно, се нотира и одложената имплементација на новиот Закон за буџети, но се очекува буџетскиот дефицит да се намалува постепено, а јавниот долг да се стабилизира под прагот од 60% од БДП.
Министерството за финансии ја оцени потврдата на рејтингот како важна порака до меѓународните инвеститори дека Македонија успешно ја одржува економската стабилност, дури и во услови на глобална неизвесност.
„Оваа оценка е дополнителна потврда за кредибилноста на економските политики и охрабрување за продолжување со реформите, јакнење на фискалната дисциплина и подобрување на конкурентноста на економијата – сè со цел повисок животен стандард за граѓаните и нови можности за развој“, се наведува во соопштението од Министерството.
.webp){kind=icon}
Во моментов нема коментари за веста. Биди прв да коментира...