Владата ќе распише четири нови јавни огласи за давање под закуп на 4.294 хектари државно земјоделско земјиште во 31 регион во државата.
Како што соопшти министерот за земјоделство, шумарство и водостопанство Љупчо Николовски, земјиштето во поединечни парцели до три хектари е за сите намени – долгогодишни насади (лозја, овоштарници), оранжерии, маслинарници...
Николовски најави и дека до крајот на мај се подготвуваат уште два огласа за доделување државно земјоделско земјиште над три хектари – едниот за одгледување сточна храна, а вториот за сите останати намени согласно Законот за земјоделско земјиште.
„Нашата цел е зголемено домашно производство. Секоја педа од земјиштето ќе биде ставена во функција“, изјави Николовски.
Според него, интересот за првиот оглас е огромен, пристигнале рекорден број апликации.
„Комисијата заседава, а јавното наддавање за тоа кој ќе склучи договор, ќе биде закажано за следната недела. Тоа што интересот е огромен, покажува дека се доделуваат атрактивни парцели и тоа ќе влијае на домашното производство“, рече министерот.
Тој очекува двојно зголемено производство на сончоглед следната година или околу 10.000 тони.
„Ако годинава беа откупени 5.000 тони сончоглед за производство за масло за јадење, очекувам догодина тоа да биде дуплирано и да изнесува околу 10.000 тони. Тоа го потврдуваат и земјоделците и преработувачите“, изјави Николовски.
Националниот план за производство на храна, потсети министерот, e донесен за да се искористат сите капацитети и потенцијали, за сите ресурси да се стават во функција на зголемување на производството.
„Верувам дека ќе успееме на среден и на долг рок да го намалиме увозот и да станеме увозно независни“, истакна Николовски.
.webp){kind=icon}
