Македонија урна рекорд во недостиг од работници

Бројот на слободни работни места во Македонија заклучно со четвртото тримесечје од 2025 година изнесувал 10.615, што е убедливо највисока бројка за повеќе од една деценија. Новиот рекорд е само потврда дека во земјава веќе подолг период постои хроничен недостиг од работници во повеќе сектори. Меѓу главните причини за ваквата состојба се нискиот стандард на работниците во Македонија поради што расте бројот на македонски граѓани кои се иселуваат и среќата си ја бараат надвор, како и лошите демографски политики кои придонесоа кон континуиран негативен природен прираст.

Се бара човек повеќе во услужните дејности и продажбата

Државниот завод за статистика соопшти дека стапката на слободни работни места во четвртото тримесечје од 2025 година изнесува 2,14 проценти, а најголем број слободни работни места, 2.387, има во услужни дејности и продажбата.

„Највисока стапка на слободни работни места од 4,39 проценти има во секторот објекти за сместување и сервисни дејности со храна, додека најмала е стапката во секторот снабдување со електрична енергија, гас, пареа и климатизација, во кој изнесува 0,09 проценти“, соопшти ДЗС.

Оттаму информираа дека Пелагонискиот регион има највисока стапка на слободни работни места од 2,49 проценти, деловните субјекти со 10 до 49 вработени имаат највисока стапка на слободни работни места од 2,64 проценти.

Невработени над 90.000 лица од активното населние

Државниот завод за статистика неодамна соопшти дека бројот на невработени лица во четвртото тримесечје од 2025 година е намален за 0,4 проценти во споредба со третото тримесечје од 2025 година и за 3,6 проценти во споредба со истото тримесечје од минатата година.

Оттаму информираа дека заклучно со четвртото тримесечје 2025 година бројот на активно население изнесува 800.911 лица, бројот на вработени изнесува 709.523 лица, а бројот на невработени изнесува 91.388 лица. Стапка на активност е 52,8 проценти, стапка на вработеност е 46,8 проценти, а стапката на невработеност е 11,4 проценти.

Од вкупниот број на невработените лица, невработени мажи се 57,9 проценти, а жени 42,1 проценти. Бројот на вработени лица бележи зголемување од 0,6 проценти. Од вкупниот број вработени,  57,8 проценти се мажи, а 42,2 проценти се жени.

„Учеството на неформалната вработеност се намалува. Неформално вработени лица се 90.293, што е за 10,3 проценти помалку од претходното тримесечје. Најголем број неформално вработени лица, 45,9 проценти, има во секторот земјоделство, шумарство и рибарство и 16,9 проценти во секторот градежништво“, наведе ДЗС.

Катастрофален природен прираст

Македонија со години наназад бележи негативен природен прираст, а овој тренд продолжи и минатата година. Во четвртото тримесечје од 2025 година, во споредба со истиот период од 2024 година, бројот на живородените деца изнесува 3.842 и е намален за 2,5 проценти. Бројот на умрените лица во четвртото тримесечје од 2025 година бележи намалување од 8,2 проценти во споредба со истото тримесечје од 2024 година и изнесува 4.798 лица.

„Природниот прираст е негативен и изнесува -956 , што значи дека за толку  лица е помал бројот на живородените деца од  бројот на умрените лица“, соопшти ДЗС.

Од заводот информираа дека во последното тримесечје од минатата годината се склучени 2.310 бракови и нивниот број е намален за 4,8 проценти во споредба со  истиот период од 2024 година.

Македонски работници – барајте ги во Германија

„Блумберг Адрија“ неодамна објави дека вкупниот број македонски државјани регистрирани како странци што живеат во Германија заклучно со 2023 година изнесувал 156.845 лица, што е двојно повеќе отколку пред десет години, кога во оваа земја имало околу 77.000 лица од Македонија. Според податоците на германскиот Федерален завод за статистика само во периодот од 2019 до 2023 година бројот на македонски граѓани евидентирани како странци во Германија се зголемил за повеќе од 41.000 лица.

Веќе пишувавме дека на европско тло се развива своевидна трка по работници, во која Македонија веројатно ќе заврши на некое од последните места бидејќи не може да им конкурира на повеќето европски земји кога станува збор за висината на платите и животниот стандард. Податоците на „Евростат“ покажуваат дека стапката на слободни работни места во Европската Унија изнесувала 2,4 проценти заклучно со вториот квартал од 2024 година и е на повисоко ниво од македонската, која во истиот период изнесувала 1,95 процент.

 

Тие се показател дека некои од работодавците од нашата и од европските земји се мачат да најдат работници, меѓутоа и дека на пазарот на трудот во Европа има голем простор за апсорпција на работна сила од Македонија. Поради лошите демографски трендови, станува јасно дека трката допрва ќе се разгорува и дека ќе прерасне во спринт кога станува збор за одредени дејности во кои недостигот од работници е најизразен.