ВИ ќе го преобликува пазарот на трудот во АСЕАН, но без масовни отпуштања

Вештачката интелигенција би можела да ги преобликува работните места на речиси 80 милиони луѓе во Југоисточна Азија, но засега нема знаци дека довела до масовни кратења на работни места, соопшти Меѓународната организација на трудот (МОТ).

Речиси 80 милиони работници, односно 22,9 отсто од вкупната вработеност во земјите од Асоцијацијата на земјите од Југоисточна Азија (АСЕАН), работат во занимања во кои вештачката интелигенција може да автоматизира или да помогне при извршувањето барем на дел од задачите, се наведува во извештајот на МОТ објавен во средата.

Од нив, околу 11,7 милиони работници, или 3,3 отсто од вкупната вработеност, се во занимања што спаѓаат во категоријата со најголема изложеност на влијанието на вештачката интелигенција. Околу 67 отсто од вработените работат во занимања кај кои не е утврдено изложување на влијанието на ВИ.

Вработеноста во занимањата со најголем потенцијал за автоматизација или унапредување на задачите со помош на вештачката интелигенција продолжила да расте од 2017 година наваму, вклучително и по појавата на генеративната вештачка интелигенција, што укажува дека технологијата сè уште не предизвикала широко нарушување на пазарот на трудот. Меѓу занимањата со најголема изложеност на ВИ се финансиски аналитичари, развивачи на мултимедијални содржини и финансиски брокери, покажува извештајот.

„Наодите укажуваат на сè поголемото значење на занимањата во кои генеративната вештачка интелигенција сè повеќе може да ги преобликува задачите и работните процеси“, соопшти МОТ. Иако генеративната вештачка интелигенција може да ја зголеми продуктивноста при поединечни задачи, тие придобивки сè уште не се преточиле во мерливи промени во продуктивноста и вработеноста.

Овие наоди се разликуваат од најавените намалувања на работната сила поврзани со вештачката интелигенција во компании како „Шопи“ (Shopee), во сопственост на „Си“ (Sea Ltd.), и „Мета платформ“ (Meta Platforms Inc.). Иако дел од компаниите ги намалуваат работните места или ги преструктурираат своите работни сили со воведувањето на ВИ, вработеноста во занимањата со најголема изложеност на оваа технологија продолжува да расте низ Југоисточна Азија, утврди МОТ.

Сингапур има најголем удел на работници во занимања изложени на влијанието на ВИ, со 42,2 отсто од вкупната вработеност. Потоа следуваат Филипините, Индонезија, Виетнам и Тајланд. Сингапур е и најподготвен за примената на ВИ, благодарение на напредната дигитална инфраструктура, големиот број квалификувани кадри и координираниот пристап на државните институции, наведува МОТ.

Организацијата ги повика владите да го зајакнат управувањето со вештачката интелигенција и подобро да ги интегрираат политиките за ВИ преку пристап насочен кон човекот, оценувајќи дека тоа е клучно за да им се помогне на работниците и компаниите да се приспособат.

„Во крајна линија, идните исходи на пазарот на трудот ќе зависат помалку од самата изложеност на ВИ, а повеќе од политиките што ќе ја зајакнат подготвеноста и отпорноста на работниците, компаниите и институциите за приспособување и справување со транзицијата кон вештачката интелигенција“, соопшти МОТ.