Миновски: Можно е ново поскапување на струјата ако не се зголеми производството

Мора да се зголеми производството на електрична енергија во земјата за да нема големи поскапувања на струјата но, истовремено треба да се внимава на начинот, односно на суровините од кои што се произведува струјата, вели универзитетскиот професор Драган Миновски.

Тој во разговор за Блумберг Адриа ТВ вели дека се неопходни големи инвестиции во енергетиката на долг рок, ама тие инвестиции истовремено треба да се во насока на транзиција кон почиста енергија.

„Доколку навистина имаме зголемено производство на електрична енергија од домашните производни капацитети, тогаш не би требало да има поголемо зголемување на цената на електричната енергија во наредниот период. Меѓутоа, доколку производството на електрична енергија биде на ниво од претходната година, ако биде намалено, или ако не се остварат најавите за зголемување на производството за 20, 30, или 40 отсто во однос на претходната година, тогаш можно е зголемување на цената на електричната енергија и од 1 јануари следната година“, вели Драган Миновски, професор на универзитетот „Гоце Делчев“.

Миновски ги смета значајни преговорите со соседите, со кои што треба да се обезбеди стабилна и сигурна испорака како на струја, така и на природен гас во текот на претстојната зима.

„Од она што може да се види од берзите во регионот и од анализите за тоа како се движеа цените во претходниот период, нивото е околу 400-500 евра за мегават час, што е прилично високо. Во минатите години знаеме дека цената беше педесетина евра. Тоа значи 10 пати повисоки цени од претходниот период. Тоа се очекувањата за наредниот период“, вели професорот Миновски.

За очекувањата за цените на природниот гас и парното во земјава, но и за следните чекори што Европа треба да ги преземе за да се заузда растот на цените, погледнете го видеото со целиот разговор со професорот Драган Миновски за Блумберг Адриа ТВ.