Филмот за Мајкл Џексон дебитира во американските кина викендов

„Мајкл“ (Michael), биографски филм за кариерата на веројатно најпознатиот забавувач во светот, се очекува да биде филмот со најголема заработка во кината овој викенд, и покрај лошите критики и правните проблеми што ги принуди режисерите да изостават некои од најконтроверзните аспекти од животот на Мајкл Џексон.

Дистрибуиран од „Лајонсгејт Студиос“ (Lionsgate Studios Corp.), се предвидува дека „Мајкл“ ќе заработи најмалку 65 милиони долари во американските и канадските кина, според „Боксофис Про“ (Boxoffice Pro). Приходите на меѓународно ниво, каде што го дистрибуира „Јуниверзал Пикчрс“ (Universal Pictures) на „Комкаст“ (Comcast Corp.), би можеле да ја зголемат заработката повеќе од двојно.

Доколку „Мајкл“ има добри комерцијални резултати, „Лајонсгејт“ ќе се обиде да издаде продолжение кон крајот на 2027 година кое ќе го раскаже остатокот од приказната, според Адам Фогелсон, претседател на филмското студио на „Лајонсгејт“.

„Филмаџиите сакаат да разјаснат дека има уште многу приказна за раскажување и дека публиката ќе нè води со нејзините желби за неа“, рече Фогелсон во едно интервју. „Голем дел од неговиот одличен музички каталог не е претставен во овој филм, како и цела низа други моменти и настани од значење.“

„Мајкл“ е преполн со наелектризирани  танцови секвенци и необична изведба на Џафар Џексон - внукот на Мајкл Џексон во реалниот живот - во главната улога. Филмот е режиран од режисерот на „Ден за обука“ (Training Day), Антоан Фукуа, а продуциран од Џон Бранка - долгогодишен адвокат на Џексон и извршител на неговиот имот - и Греам Кинг. Филмот означува враќање кон музичкиот биографски жанр за Кинг, чиј филм „Боемска рапсодија“ (Bohemian Rhapsody) за фронтменот на „Квин“ (Queen), Фреди Меркјури, заработи повеќе од 900 милиони долари во 2018 година.

Филмот го следи подемот на Џексон од неговиот дом од детството во работничко предградие во Гери, Индијана, до раниот успех со неговите браќа во групата  „Џексон 5“ (Jackson 5). Филмот се фокусира на борбата на Џексон со емоционалната и физичката злоупотреба од страна на неговиот татко и менаџер Џозеф, кој го игра Колман Доминго. „Мајкл“ завршува со концертен настап во Лондон за време на турнејата „Лош“ (Bad) во 1988 година, со епилог кој гласи „неговата приказна продолжува“.

 Џафар Џексон во улогата на Мајкл Џексон. Фото: Lionsgate

 

Тогаш животот на Џексон ќе влезе во попроблематични води. Во 1993 година, ќе бидат изнесени првите обвинувања за злоупотреба на деца против пејачот. Последните години од животот на Џексон беа обележани со обвинувања, зависност од опијати, бесот на јавноста поради тоа што го покажа своето новородено дете од балконот на хотел на крајно ризичен начин, самонаметнат егзил во Бахреин и финансиски тешкотии што го доведоа до работ на банкрот. Почина во јуни 2009 година на 50-годишна возраст од предозирање со анестетикот „пропофол“, неколку недели пред да одржи серија концерти.

Фукуа и Кинг се обидоа да ги вклучат обвинувањата за злоупотреба на деца во филмот „Мајкл“, но се откажаа поради грешка направена од страна на управувачите со имотот на Џексон. Претходните договори со тужителот вклучувале дека тие обвинувања  да не се користат за комерцијални цели.

По тоа откритие, „Лајонсгејт“ мораше да го пресними поголемиот дел од филмот, што ја зголеми цената за десетици милиони долари, според луѓе запознаени со ова прашање. На крајот сето тоа  го зголеми вкупниот буџет на околу 200 милиони долари. 

Фукуа и Кинг требаше да бидат платени 10 милиони и 6 милиони долари, респективно, за режирање и продуцирање на „Мајкл“, рекоа луѓето, кои побараа да не бидат именувани бидејќи информациите се приватни. Со изменетата содржина на филмот и потенцијално засегнатите  приходи од кино благајните, претставниците на Фукуа и Кинг обезбедија дополнителни исплати од повеќе од 15 милиони и 10 милиони долари, соодветно, од имотот на Џексон, дознава Блумберг.

Како режисерите ќе се справат со обвинувањата за злоупотреба на деца во продолжението на филмот сè уште не е утврдено. Портпаролите на Фукуа, Кинг и фондацијата на Џексон одбија да коментираат.

Мајкл досега доби само 40 отсто позитивен рејтинг од критичарите, но 96 отсто од публиката, на RottenTomatoes.com. Заедничко за рецензентите, како што напиша Џон Нуџент за филмското списание „Емпаер“ (Empire), е пофалбата за музичките изведби, но и негодување околу „непријатниот факт дека постои сосема друга страна од приказната на поп-ѕвездата, која сосема очигледно недостига овде“.

„Мајкл“ е еден од највисоко-профилните адути  на „Лајонсгејт“ оваа година и би можел да го забрза неодамнешниот успех на компанијата на кино благајните. Во декември, студиото го издаде филмот „The Housemaid“, кој оттогаш продаде билети во вредност од 400 милиони долари - приближно десет пати повеќе од неговиот буџет за продукција. Подоцна оваа година, компанијата ќе го издаде „Sunrise on the Reaping“, најновото продолжение од франшизата „The Hunger Games“ кое заработи повеќе од 3 милијарди долари на кино благајните досега.

Во мај 2025 година, „Лајонсгејт“ се одвои од „Старз Ентертејнмент“ (Starz Entertainment Corp.), мрежа и сервис за стриминг услуги што ја купи во 2016 година. Од поделбата, пазарната вредност на „Лајонсгејт“ се искачи за 41 отсто на 3,3 милијарди долари. Нејзини најголеми сопственици се хеџ фондови поврзани со Марк Рачески и поранешниот секретар за финансии на САД, Стивен Мнучин.