Зошто Кристофер Нолан сака да го гледате „Одисеја“ на посебно филмско платно

Фанови низ целиот свет почнаа да се собираат во кино-салите кон средината на јули за да го гледаат „Одисеја“ (The Odyssey), филмуваната верзија на епската грчка поема на Хомер од режисерот Кристофер Нолан. Повеќе од половина од нив го гледале филмот во формат со подобрен екран. Тоа вклучува аудиториуми со ласерски проектори со повисок контраст, како и омилената опција на Нолан - проекција со 70 милиметарски филмски формат со кој го снимил филмот, што доловува неверојатни детали за огромните екрани на „Имакс“ (Imax Corporation).

Филмските студија и кино-салите агресивно ги промовираат висококвалитетните формати затоа што тие нудат искуство што не може да се создаде дома, вклучувајќи екрани високи 52 стапки - приближно двојно поголеми од стандардните. Кино-салите исто така можат да наплаќаат повеќе за нив: и до 33 долари за билет на места како Њујорк или Лос Анџелес. Тоа е добивка за сопствениците на кино-салите и студијата, кои ги делат приходите од бокс офисот.

Еве еден вовед за компанијата што го промовираше искуството со голем екран.

 

Што е „Имакс“?

„Имакс“, со седиште во предградието на Торонто, Мисисага, и воден од канцеларии во Њујорк и Лос Анџелес, во својата суштина е технолошки бизнис кој ја лиценцира својата софтверска технологија за голем екран, интелектуална сопственост, архитектура на аудиториуми и специјализирана опрема на речиси 1.900 локации низ светот.

Главниот дел од технологијата потребен за снимање „имакс“ филм е специјализирана камера која снима со многу повисока резолуција од другите формати. Големината на секој кадар е поголема, што овозможува повисоко ниво на јасност, длабочина на боја и острина. Уредите се гломазни и нестабилни, па потревни се специјални кранови и колички за да ги издржат вибрациите. Поради подобрената јасност, „имакс“ камерите исто така бараат поинтензивно осветлување.

Нолан и неговиот долгогодишен директор на фотографија, Хојте ван Хојтема, работеа со „Имакс“ за да развијат нова камера која ја именуваа по канадскиот филмски продуцент и извршен директор Дејвид Кејли, застапник на форматот за голем екран кој почина минатата година.

 

Што ги прави „Имакс“ платната посебни?

Дизајнот на големиот екран на компанијата го проширува аглите на периферното видно поле на гледачот, создавајќи пореалистично и поимпресивно искуство. Резолуцијата снимана со „имакс“ камерите станува особено очигледна кога сликата се проектира на поголеми екрани.

 

Споредба на формати Reddit

 

 

Како заработува „Имакс“?

Компанијата добива процент од светските приходи на филмскиот бокс офис од студиото што го направило филмот. Тоа е во замена за ремастеризирање на филмот во „имакс“ формат и негово дистрибуирање во кино салите што работат со нивните екрани. Компанијата исто така заработува од продажба и одржување на „имакс“ системите во кино-салите. Прилагодената добивка на „Имакс“ пред камати, даноци, амортизација и депрецијација изнесувала 185 милиони долари во 2025 година, на рекорден приход од 410 милиони долари. 

 

Што е потребно за „имакс“ издание?

Користењето на „имакс“ камери во продукцијата на филм резултира со загарантиран прозорец за пристап до „имакс“ екрани. Филмските студија инаку се натпреваруваат за датуми на календарот на „Имакс“ и често ги поместуваат своите изданија за да обезбедат дистрибуција на мрежата.

Дванаесет филмови најавени за годинава беа снимени со „омакс“ камери, изјави извршниот директор на компанијата, Рич Гелфонд, во интервју на „Блумберг ТВ“ (Bloomberg TV) на 20 јули.

 

Каде може да гледате „имакс“ филм?

„Имакс“ има 1.798 комерцијални локации низ светот. Со додавање на институционални места како музеи и научни центри, мрежата броеше 1.865 системи во 91 земја на крајот од минатиот квартал.

Тоа е мал опфат во споредба со вкупниот број кино-сали глобално. Ова доведе до силна конкуренција меѓу гледачите за билети за „имакс“ проекции. Некои фанови во САД дури патувале надвор од своите држави за да гледаат филмови како „Одисеја“ во овој формат.

 

Зошто „Имакс“ стана поважен за филмската индустрија?

Кино индустријата бавно закрепнува од нарушувањето предизвикано од пандемијата на ковид-19 и се соочува со растечка конкуренција од стриминг сервисите, бидејќи дел од поранешните гледачи сега избираат да чекаат додека насловот стане достапен за во домашни услови наместо да го гледаат за време на премиерниот викенд.

„Имакс“ стана многу ефикасна алатка за брендирање во маркетингот на потенцијални блокбастери, бидејќи името сигнализира искуство што не може да се реплицира дома. Поскапите билети исто така можат да помогнат да се зголемат приходите од бокс офисот.

 

Каква е историјата на „имакс“ изданијата?

Компанијата е основана кон крајот на 1960-тите од тим канадски филмски режисери и инженери. Првиот филм снимен целосно во „имакс“ формат беше North of Superior од 1971 година, 18-минутен патопис за северениот дел на Онтарио. (Tiger Child од 1970 беше првиот филм јавно прикажан со користење на проекцискиот систем.) North of Superior користеше воздушни снимки кои станаа обележје на „iмакс“ насловите со години.

Во текот на последните неколку децении, Гелфонд ја прошири компанијата надвор од своите корени во документарни филмови за природата, култивирајќи холивудски автори како Нолан со тоа што им овозможи користење на технологијата на компанијата. Десетици филмови се снимени целосно или делумно со „имакс“ технологија, вклучувајќи го Sinners на Рајан Куглер и Џејмс Бонд филмот од 2021 година No Time to Die.

 

Зошто секој блокбастер не добива „имакс“ издание?

Опремата потребна за правење „имакс“ филмови ги прави тие продукции поскапи од обично. Некои студија и филмски автори исто така сакаат да останат посветени на своите датуми на издавање и немаат пристап до „имакс“ мрежата во тие периоди.

На пример, „Имакс“ е договорен да го прикажува Dune: Part Three почнувајќи од 18 декември. Тоа ги прави неговите кино-сали недостапни за Avengers: Doomsday, кој има ист датум на издавање. Avengers, направен од „Марвел Студиос“ (Marvel Studios) на „Волт Дизни“ (Walt Disney Co.), е закажан да биде прикажан од новиот конкурент на „Имакс“ наречен „Инфинити Вижн“ (Infinity Vision). Аудиториумите што „Дизни“ ги сертифицира како дел од мрежата мора да имаат ширина на екран од најмалку 50 стапки, ласерска проекција и 7.1 сараунд-звучен систем од „Долби Лабораторис“ (Dolby Laboratories Inc).