Ворш: Борбата со инфлацијата не е завршена, Фед ги разгледува сите опции

Претседателот на Федералните резерви (Фед), Кевин Ворш, изјави дека забавувањето на инфлацијата во јуни не значи дека борбата е завршена и првпат откако ја презеде функцијата навести како централната банка би можела да реагира во иднина.

Во текот на тричасовното сведочење пред Конгресот во вторникот, законодавците го прашуваа како планира да го исполни своето повеќепати повторено ветување за враќање на ценовната стабилност, откако Фед со години не успева да ја постигне целната инфлација од два отсто.

Иако новиот претседател на Фед не навести директно построга монетарна политика, јасно стави до знаење дека меѓу опциите за ограничување на инфлацијата се и каматните стапки.

„Ги имаме потребните алатки за тоа“, рече Ворш. „Во периодот што следува ќе побарам од колегите да имаме сериозна внатрешна дебата за обемот и временската рамка во која би требало да ги примениме“, додаде тој, мислејќи на инструментите на монетарната политика на Фед.

Економистите оценија дека овие изјави не упатуваат на скоро зголемување на каматните стапки, но дека досега се најјасниот сигнал од новиот претседател на Фед дека монетарната политика би можела да биде дополнително заострена.

„Досега, ова е најјасниот сигнал од Ворш дека Фед би можел да ги зголеми каматните стапки како одговор на упорно високата инфлација, без притоа експлицитно да најави зголемување.“, изјави Олу Сонола, директор за економија на САД во „Фич рејтингс“ (Fitch Ratings).

Во белешка до клиентите, економистите на „Голдман Сакс“ (Goldman Sachs) оценија дека изјавите на Варш претставуваат „навестувања за неговите ставови во однос на одговорот на високата инфлација предизвикана од шокови на страната на понудата“.

Без однапред дадени насоки

Ворш беше номиниран за функцијата претседател на Фед од претседателот Доналд Трамп, кој со години бара пониски трошоци за задолжување. Откако ја презеде функцијата во мај, новиот претседател вети дека ќе стави крај на практиката централната банка однапред да сигнализира во кој правец ќе се движат каматните стапки, позната како „форвард гајденс“ (forward guidance). Тој и други претставници на Фед ја критикуваат оваа практика, оценувајќи дека им ги врзува рацете на носителите на монетарната политика кога економските услови се менуваат.

Во таа насока, Ворш досега избегнуваше да зборува за тоа како Фед би реагирал доколку инфлацијата не продолжи да се намалува, иако некои од неговите колеги креатори на монетарната политика отворено ја споменаа можноста за зголемување на каматните стапки.

Сепак, не сите беа убедени дека неговите последни коментари претставуваат нешто ново.

Џејсон Фурман, еден од водечките економисти во администрацијата на поранешниот американски претседател Барак Обама, а сега професор на Факултетот за јавна администрација „Кенеди“ при Универзитетот „Харвард“, рече дека Ворш бил доследен и внимавал да не понуди нови насоки за време на своето сведочење.

„Секој што мисли дека во неговите изјави може да препознае навестувања за идните планови, погрешно ги толкува“, рече Фурман. „Во овој момент не би извлекувал никакви заклучоци од неговите изјави, бидејќи мислам дека сè уште нема донесено одлука што сака да направи.“

Трговците ги намалија обложувањата дека Фед ќе ги зголеми каматните стапки во јули, откако податоците за инфлацијата, објавени претходно во вторникот, покажаа дека потрошувачките цени во јуни се намалиле првпат по шест години. Тоа се случи во период на прекин на борбените дејства меѓу САД и Иран, кои во меѓувреме повторно ескалираа. Мерката за базичната инфлација, која ги исклучува нестабилните цени на храната и енергијата, остана непроменета.

„Податоците за индексот на потрошувачките цени CPI, многу му ја олеснија оваа расправа“, изјави Стивен Ингландер, глобален директор за истражување на девизните пазари на земјите од Г10 во „СЦБ“ (Standard Chartered Bank).

Иако пониските од очекуваните податоци за инфлацијата го намалија притисокот врз Ворш за време на сослушувањето, законодавците продолжија да го испрашуваат претседателот на Фед како планира инфлацијата повторно да ја врати на целното ниво.

Ворш рече дека податоците за инфлацијата во јуни биле подобри од очекувањата, но дека останува уште многу работа.

„Нема да дојдам овде и да кажам дека мисијата е завршена“, рече Ворш. „Она што можам да го кажам е дека нè очекува уште многу работа.“

Според Кети Бостјанчиќ, главен економист во „Нешнвајд“ (Nationwide), севкупниот тон на неговите изјави навестува поцврст пристап кон монетарната политика. Како што додаде таа, неговите коментари сугерираат дека „ако инфлацијата остане упорно висока, тој во одреден момент би можел да поддржи зголемување на каматните стапки“.

Ворш го искористи сослушувањето за да ја претстави својата поширока агенда за промени во централната банка, ветувајќи „промена на режимот“ преку формирање пет нови работни групи што ќе ги преиспитаат и потенцијално ќе ги реформираат клучните делови од процесот на носење одлуки во Фед.

Ветувајќи дека ќе ја брани независноста на централната банка, Ворш рече дека политиката ќе ја држи надвор од Фед и дека нема да се двоуми да преземе мерки што ѝ се потребни на економијата.

„Нашата работа, мојата обврска кон вас, е да ги направиме цените што остануваат тврдокорно високи повторно пофлексибилни“, рече Ворш.