Емиратите со инвестиција од 40 милијарди евра ја зајакнуваат врската со Германија

Обединетите Арапски Емирати (ОАЕ) се обврзаа да инвестираат 40 милијарди евра во Германија, во сектори од вештачка интелигенција до енергетика и одбрана. Таа инвестиција ќе ги продлабочи нивните врски со Европа и дополнително ќе ги диверзификува трговските односи на оваа заливска земја на глобално ниво.

 

„Многу ни е важно да обезбедиме нашата економија, трговија и инвестиции да бидат поврзани со економските центри низ светот“, изјави министерот за надворешна трговија на ОАЕ, Тани ал Зејуди, во интервју за „Блумберг ТВ“ (Bloomberg TV) во Берлин во четвртокот. „Главната порака повторно е диверзификација, односно обезбедување да имаме алтернативи и нови пазари.“

Тој ја нарече оваа инвестиција, од која околу една третина е наменета за Баварија, „само почеток“, навестувајќи дека конечниот износ би можел да биде и поголем. Ал Зејуди престојуваше во Германија со претседателот на ОАЕ, шеикот Мохамед бин Зајед ал Нахјан, кој беше во својата прва официјална државна посета на оваа земја уште од 2019 година, кога беше престолонаследник на Абу Даби.

Лидерот на ОАЕ се сретна со канцеларот Фридрих Мерц и присуствуваше на државна вечера, чиј домаќин беше претседателот Франк-Валтер Штајнмаер. За него беше обезбедено највисоко ниво на безбедност во Германија, со ангажирање на околу 1.300 полициски службеници.

Повеќе од шест месеци по почетокот на конфликтот за кој претседателот Доналд Трамп еднаш рече дека ќе заврши за неколку недели, САД и Иран остануваат заглавени во циклус на меѓусебни напади и кревки примирја, додека заливските нации се борат со последиците од нарушувањата на трговијата низ Ормускиот Теснец, што го задушува обемот на енергентите и ги оптоварува синџирите на снабдување.

Во такви околности, проширувањето на одбранбените врски надвор од Вашингтон, главниот сојузник на ОАЕ, стана област на фокус за богатите блискоисточни петромонархии, при што Германија е клучен сојузник.

Оваа земја се обврза до 2039 година да изгради најсилна армија во Европа за да ја одврати Русија, а Мерц за време на февруарската турнеја низ Заливот, која ѝ претходеше на војната со Иран, изјави дека е отворен за зајакнување на одбранбената соработка со тој регион.

Ветувањето на ОАЕ исто така може да претставува ветер во грб за Мерц и неговата влада, и тоа само неколку дена откако претрпеа удар со наглиот подем на крајно десничарската партија Алтернатива за Германија на покраинските избори во Саксонија-Анхалт.

„Постои огромна продажна можност за многу од нашите одбранбени компании“, рече Ал Зејуди. „Не станува збор само за купување и развој на индустриска или одбранбена опрема од германскиот пазар туку и за снабдување на истите тие со некои од најновите технологии што веќе сме ги примениле во текот на конфликтите во последните неколку месеци.“

Најновите планови на ОАЕ доаѓаат како додаток на 34 милијарди евра што веќе ги инвестирале во Германија. Низ Европа, оваа заливска нација се обврза на сличен износ кон Италија и на дури 50 милијарди евра кон Франција. Земјата, која е меѓу најверните сојузници на Трамп, исто така инвестира 1,4 билион долари во САД.

Нејзиниот главен град Абу Даби е дом на шест отсто од светските резерви на нафта и на суверени инвестициски фондови што контролираат имот вреден речиси два билиона долари. Најновото ветување претставува уште еден показател за решеноста на оваа земја да ја искористи својата инвестициска моќ за зајакнување на одбранбените врски, истовремено зацврстувајќи ги капацитетите за снабдување и производство за да заобиколи какви било извозни ограничувања.

„Конфликтот е нешто со што се справуваме“, изјави Ал Зејуди. „Маневрираме низ предизвиците и влијанијата на геополитиката и на самиот регион.“

Околу 10 милијарди евра ќе ѝ бидат доделени на Баварија, рече тој, додека остатокот ќе биде распределуван „секогаш кога ќе се појави област за соработка“. Тој ги издвои дигитализацијата и вештачката интелигенција, покрај логистиката и индустрискиот развој, како клучни точки на плановите на ОАЕ во Германија.

Податочните центри и вештачката интелигенција претставуваат централен столб на настојувањата на ОАЕ да ја диверзифицираат својата економија и да го прошират политичкото влијание. Главниот инвестициски фонд на Абу Даби за вештачка интелигенција МГХ (MGX) планира во следните години да троши до 10 милијарди долари годишно на избрани компании, со цел да достигне повеќе од 100 милијарди долари средства под управување.

Посетата на лидерот на ОАЕ се случи во критичен момент. Лидерите на Емиратите и Саудиска Арабија и самите настојуваат да обезбедат посилно дипломатско упориште во европските престолнини, иако Вашингтон останува главниот сојузник на заливските нации.

За време на посетата на Париз минатиот месец, саудискиот престолонаследник Мохамед бин Салман претстави низа договори, од технологија до одбрана, вклучувајќи и забавен парк вреден шест милијарди евра. Тоа се случи околу 18 месеци откако францускиот претседател Емануел Макрон беше фотографиран како го прегрнува својот колега од Емиратите, шеикот Мохамед, во Елисејската палата.