.webp){kind=icon}
Претседателот Џереми Пауел сигнализира дека Федералните резерви (ФЕД) ќе го забават темпото на зголемување на каматните стапки следниот месец, истовремено нагласувајќи дека трошоците за задолжување мора да продолжат да растат уште некое време за да се победи инфлацијата. Неговиот коментар, во говорот одржан синоќа на институтот „Брукингс“ во Вашингтон, веројатно ги зацврстува очекувањата дека ФЕД ќе ја зголеми каматната стапка за 50 базични бода, кога банкарите ќе се состанат на 13 и 14 декември, по четири по ред покачувања од 75 базични бода.
„Времето за умерено темпо на зголемување на каматните стапки може да дојде веќе на состанокот во декември. Со оглед на нашиот напредок во заострувањето на политиката, времето на таа умереност е далеку помалку важно отколку што уште мора да ги зголемуваме каматите за да ја контролираме инфлацијата и колку време ќе биде потребно за политиката да се одржи на рестриктивно ниво“, рече Пауел во својот говор.
Пауел рече и дека каматната стапка веројатно ќе достигне малку повисоко ниво отколку што проценуваа банкарите во септември, кога просечната проекција беше 4,6 проценти во следната година. Тие проекции ќе бидат ажурирани на состанокот во декември.
Инвеститорите проценуваат дека ФЕД ќе паузира со зголемувањето во второто тримесечје следната година, откако каматите ќе достигнат пет отсто. Додека трговците очекуваат намалување на стапката подоцна во текот на годината, Пауел рече дека намалувањето не е нешто што ФЕД сака да го направи наскоро.
Додека економистите сметаат дека рецесија во следните 12 месеци е повеќе веројатна отколку неизводлива, Пауел рече дека т.н. меко приземјување и натаму е многу веројатно и сè уште остварливо, иако призна дека патот до таквиот исход се стеснува.
„Што се однесува до зголемувањето на каматните стапки, сметаме дека забавувањето во овој момент е добар начин за урамнотежување на ризикот за економијата од инфлација и забавен раст“, рече Пауел.
Регионалната економска анкета на ФЕД, објавена вчера, покажува дека економската активност во последните недели била приближно непроменета или благо пораснала од претходниот извештај, што претставува пад од скромното просечно темпо на раст во претходниот период за ревизија, кој траеше до почетокот од октомври.
Пауел рече дека централната банка предвидува дванаесетмесечна инфлација на база на нејзиниот мерач, индексот на цени за лична потрошувачка, од шест проценти до октомври и базична стапка на инфлација од пет отсто. Тоа е приближно во согласност со процените на приватните економисти пред официјалните бројки, кои би требало да бидат објавени денеска.
Индексот на цените во споредба со растот на каматните стапки од страна на ФЕД / Bloomberg Mercury
„Нема доволно цврсти докази што уверливо би тврделе дека инфлацијата наскоро ќе забави“, рече Пауел, додавајќи дека ќе бидат потребни значително повеќе докази за да се утешиме дека инфлацијата навистина опаѓа.
„Вистина е дека патот за инфлацијата и натаму е неизвесен. И покрај строгата политика и забавениот раст во текот на последната година, не видовме јасен напредок во забавувањето на инфлацијата“, рече Пауел.
Компоненти на инфлацијата
Претседателот на ФЕД во својот говор се осврна и на компонентите на инфлацијата. Тој напомена дека цените на стоката забавија, но додаде дека е прерано да се прогласи дека инфлацијата на производите е победена. Пауел напомена и дека стапките на инфлација кај новите куќи под наем паѓаат. Тој започна расправа и за трошоците за услуги, фокусирајќи се на скромната понуда на пазарот на работна сила, при што јазот во понудата и побарувачката на работна сила тој главно го објаснува со пензионирањата во периодот на пандемијата.
„Тие прекумерни пензионирања сега може да чинат повеќе од два милиона од вкупно 3,5 милиони работници што недостигаат. Пазарот на работна сила покажува само привремени знаци на тоа што се нарекува ребалансирање, додека платите се значително над нивото што е во согласност со инфлацијата од два процента во текот на времето“, рече Пауел.
Неговите забелешки доаѓаат во време кога ФЕД се подготвува за влез во период на замрачување пред состанокот на крајот од неделата. И покрај зголемените трошоци за задолжување, американската економија продолжи со раст проследен со одржлива побарувачка и постојано вработување.
Таа отпорност додека инфлацијата останува тврдоглаво над целта на ФЕД од два отсто укажува на потребата за постојано зголемување на каматните стапки, велат креаторите на политиките.
Месечниот извештај за вработување в петок веројатно ќе покаже пораст од 200.000 слободни работни места во текот на ноември, што би било најбавно во последните две години, сметаат економистите што ги анкетира „Блумберг“. Како уште еден знак на ладење на пазарот на работна сила се податоците објавени вчера, кои покажуваат дека бројот на отворени работни места во САД е намален во октомври, додека стапката на напуштање, која мери доброволни откази од работа како удел во вкупната вработеност, исто така опаѓа.
Неколку други банкари од ФЕД рекоа дека имаат желба да го забават темпото на зголемување на каматните стапки, истовремено сугерирајќи дека стапката ќе го достигне врвот на повисоко ниво од очекуваното, како што рече Пауел на 2 ноември, по последниот состанок на централната банка за политиката.
