Кнез: ФЕД порача дека стапките на крајот од 2023-та ќе бидат повисоки

Шефот на Федералните резерви, Џером Пауел, во средата, по дводневниот состанок, објави дека американската централна банка нема намера да отстапи од кампањата против инфлацијата, а и од зголемувањето на каматните стапки. Задолжувањето следната година ќе биде уште поскапо отколку што сега очекуваат инвеститорите, беше пораката по објавувањето на покачувањето на каматните стапки на ФЕД за уште 50 базични поени.

„Очигледно е дека ФЕД не е импресиониран од најновите податоци за инфлацијата. Имавме два месеца едноподруго со добри податоци, нешто што би ги охрабрило пазарите и ФЕД да бидат помалку рестриктивни, но Федералните резерви сепак решија да одат на друга страна“, коментира главниот аналитичар на „Блумберг Адрија“, Андреј Кнез, кој нагласи дека ваквата одлука ја смета за разумна.  

Претходно оваа година, вели тој, инфлацијата во САД знаела да изненади надолу во еден месец, а потоа се зголемувала за два месеца.

„ФЕД испраќа порака дека референтните стапки ќе бидат за 25 базични поени повисоки на крајот на следната година отколку што се мислеше до вчера. Тоа е суштината на порестриктивната порака што ја видовме вчера“, смета нашиот аналитичар.

ФЕД објави и нови, пониски проекции за БДП и зголемени проекции за стапката на невработеност. „Во комбинација, особено стапката на невработеност според економските модели кажува дека Америка, барем технички, ќе биде во рецесија во наредните квартали“, забележува Кнез.

Денеска ЕЦБ ќе ги претстави своите одлуки. „Се очекува зголемување на референтните стапки за 50 базични поени, тоа веќе го знаат и гулабите на гранките. Затоа, повнимателно ќе се следи што ќе каже ЕЦБ за своето портфолио на обврзници. Неодамна објавија дека во рамките на своето портфолио имаат 30 милијарди евра во обврзници, кои достасуваат во текот на наредните неколку месеци“, рече тој.

Во моментов нема коментари за веста. Биди прв да коментира...

Остави коментар