.webp){kind=icon}
Претставниците на Федералните резерви (ФЕД) рекоа дека каматните стапки можеби ќе треба да се движат на повисоко ниво од очекуваното за да се осигури дека инфлацијата продолжува да паѓа, откако новите податоци покажаа дека цените се зголемија со брзо темпо минатиот месец.
Претседателот на ФЕД Ричмонд, Томас Баркин, говорејќи денеска во интервју за ТВ Блумберг, рече дека ако инфлацијата опстојува на нивоа далеку над целта, можеби ќе треба да се направи повеќе. Претседателката на ФЕД Далас, Лори Логан, рече дека мора да останат подготвени да продолжат со зголемувањата на стапките подолг период од предвидениот доколку таквиот пат е неопходен за да се одговори на промените во економските изгледи. Таа зборуваше на универзитетот „Прери вју“ (Prairie View A&M University) во Тексас.
И двајцата коментираа набргу откако податоците покажаа дека потрошувачките цени се искачиле за 6,4 проценти во јануари во однос на истиот месец претходната година, што сè уште е далеку над целта на ФЕД за годишна инфлација од два отсто. Вкупниот индекс на потрошувачки цени се искачи за 0,5 проценти во однос на декември, зајакнат со трошоците за бензин и домување. Тоа беше во согласност со очекувањата на економистите, но забележа најголем пораст во последните три месеци.
„Инфлацијата се нормализира, но полека се намалува“, рече Баркин во интервјуто.
Претставниците на ФЕД агресивно ги зголемуваат стапките за да се обидат да ја оладат инфлацијата, која минатата година достигна највисоко ниво во последните 40 години. На почетокот на февруари тие ја подигнаа нивната референтна каматна стапка за четвртина процентен поен, на опсег од 4,5 до 4,75 проценти. Тоа следуваше по зголемувањето за половина процентен поен на нивниот состанок во декември, кој дојде по четири последователни покачувања на каматите за 75 базични поени.
Реакција на пазарот
Индексот S&P 500 падна, а приносите на државните трезори скокнаа по најновите податоци за инфлацијата. Инвеститорите сега даваат речиси еднакви шанси дека претставниците на ФЕД ќе ги зголемат стапките за четвртина процентен поен во јуни, по слични зголемувања во март и мај. Очекувањата за тоа каде ќе го достигнат врвот каматните стапки се зголемија по податоците за работни места и континуираните знаци на постојано високи цени, кои се посилни од очекуваните.
Логан рече дека гледа два ризика за монетарната политика во моментов: да направи премалку и да предизвика враќање на инфлацијата и да направи премногу и да создаде прекумерна болка на пазарот на трудот.
Креаторите на политиките се особено загрижени од зголемувањето на цените на услугите, делумно поттикнати од недостигот од работници, кој е продлабочен од пандемијата на ковид. Претседателот на ФЕД, Џереми Пауел, предупреди дека ќе биде потребно олеснување на претесниот пазар на трудот за да се смират континуираните ценовни притисоци. Стапката на невработеност падна на 3,4 проценти, што е најниско ниво од мај 1969 година. Постојат некои индикации дека економскиот раст би можел да биде поотпорен од очекуваното, па дури и да забрза.
