Стапката на невработеност кај младите во Кина се искачи на рекордно високо ниво во мај, бидејќи економското закрепнување забави, што претставува дополнителен предизвик за креаторите на политиката, бидејќи во работната сила влегуваат нови дипломирани студенти.
Стапката на невработеност кај луѓето на возраст од 16 до 24 години достигна 20,8 отсто, што е повеќе од 20,4 отсто во април, според податоците објавени од Националното биро за статистика (НБС) во четвртокот. Тоа е четири пати повеќе од стапката на општата невработеност, која остана непроменета на 5,2 отсто.
Над 33 милиони млади луѓе влегле на пазарот на трудот, а повеќе од шест милиони од нив моментално се невработени, изјави за новинарите на брифингот во четвртокот портпаролот на НБС, Фу Лингхуи. „Популацијата на луѓе на возраст од 16 до 24 години е околу 96 милиони, но многу од нив не бараат работа бидејќи сè уште се на училиште“, додаде тој.
Економистите од „Голдман Сакс“ (Goldman Sachs Group Inc.) проценуваат дека бројот на невработени млади сега е три милиони повеќе отколку пред пандемијата.
Bloomberg
Бројките за невработеноста кај младите влијаат на „приказната за потрошувачката“, рече Кен Вонг, специјалист за капитално портфолио во „Истспринг“ (Eastspring Investments), додавајќи дека „невработеноста кај младите најверојатно ќе продолжи да расте како што свежите дипломци ќе влезат на пазарот на трудот“.
Стапката на невработеност кај младите остана висока од почетокот на 2022 година поради нарушувања предизвикани од ковид и падот на пазарот на недвижности, кои ги дополнија постојните структурни проблеми на пазарот на трудот.
Многу компании не сакаа да вработуваат поради слабото закрепнување, додека регулаторните мерки исто така резултираа со големи загуби на работни места во секторите образование, технологија и недвижности. Летото е типично време кога стапката на невработеност расте, бидејќи десетици милиони дипломирани студенти бараат работа. Според процените на „Ситигруп“ (Citigroup Inc.), речиси 12 милиони дипломирани студенти ќе влезат во работната сила оваа година, што веројатно ќе ја зголеми стапката на невработеност кај младите над 25 проценти.
Високата невработеност кај младите има негативно влијание врз довербата на потрошувачите, бидејќи домаќинствата избраа порано да ги отплаќаат долговите за да ги намалат ризиците. Властите презедоа мерки, вклучувајќи и субвенции, за да им помогнат на компаниите да ја зголемат вработеноста.
Гувернерот на Народната банка на Кина, Ји Ганг, претходно овој месец вети дека ќе го промовира вработувањето и ќе го зајакне финансирањето на индустриите клучни за стабилизирање на вработеноста, како што е услужниот сектор.
.webp){kind=icon}
