Лидерите на Г-7 се собраа во Франција со обемна агенда на Самитот што ги опфаќа мировниот договор меѓу САД и Иран, иднината на војната во Украина, ризиците од вештачката интелигенција за финансискиот сектор и обезбедувањето критични минерали. Додека Вашингтон и Техеран се обидуваат да го спроведат договорот и да го нормализираат сообраќајот низ Ормутскиот Теснец, европските сојузници бараат напредок и околу Украина, а економските теми сè повеќе се насочени кон ВИ и сигурноста на синџирите на снабдување.
Добро утро, ви пишува Анита С. Буховски од дигиталната редакција на „Блумберг Адрија“. Во продолжение се петте вести што ги издвоиме за почеток на денот.
Пазар на труд: Фалат 10.000 работници, а над 35.000 лица се без работа над пет години
Стапката на невработеност во Финска во април достигна највисоко ниво во овој век. Податоците на Евростат покажуваат дека изнесувала 10,7 отсто и ова е највисокото ниво од 2000 година досега. Невработеноста расте и во Франција. Податоците на европската статистичка служба покажуваат дека во април стапката изнесува 8,2 отсто и е највисока во последните пет години. Трендот на раст на невработеноста во Европската унија, иако незначителен, почна лани. Во 2025 година вкупната стапка за 27 - те земји членки изнесува 6 отсто, споредено со 5,9 отсто за 2024 година.
За разлика од ЕУ, во земјава, невработеноста се намалува, но многу бавно. Од почетокот на минатата година до крајот на првиот квартал годинава, според податоците на Државниот завод за статистика бројот на невработени се намалил за околу 2000 лица.
Првото вработување и во Македонија: Диплома ама и курсеви, академии, сертификати...
Младите дипломираат, па потоа собираат сертификати, учат вештачка интелигенција, посетуваат академии и дополнителни курсеви, но сè потешко доаѓаат до првата работа. Пазарот на труд забрзано се менува, а компаниите сè почесто бараат практични вештини, адаптабилност и познавање на алатки за ВИ уште од стартот на кариерата.
За генерација млади луѓе, дипломата повеќе не е доволна сама по себе. Компаниите денес бараат кандидати што можат веднаш да се вклопат во работниот процес. Дури и за пракса и почетни позиции, во огласите сè почесто се бара познавање на алатки за вештачка интелигенција, анализа на податоци, платформи за автоматизација, дигитални алатки, работа со податоци, алатки за управување со проекти, па дури и претходно искуство.
Следниот скок на златото би можел да ги претвори рударските компании во најголемите победници на пазарот
Зголемувањето на цената на златото изгледа како едноставна инвестициска приказна, за оние кои веруваат дека златото ќе продолжи да расте, го купуваат и чекаат. Сепак, најчесто се фокусираат на самата цена на скапоцениот метал и ги игнорираат компаниите што го вадат од земјата.
Во време кога златото доживува еден од најдраматичните бумови во историјата, при што цената накратко достигна 5.600 долари за унца во јануари 2026 година, прашањето дали е помудро да се купува злато директно или акциите на компаниите што го рударат станува сè поинтересно кај инвеститорите. Пред да се одлучи, вреди да се разбере што всушност се купува во двата случаи и која од двете стратегии има потенцијал да донесе поголем принос.
Цените на житарките и растителните масла паднаа по најавата за отворање на Ормуз
Фјучерсите на житарките и растителните масла паднаа поради очекувањата дека потенцијалното повторно отворање на Ормутскиот Теснец би можело да го подобри пристапот до клучните инпути за земјоделското производство, со што би се намалила заканата од раст на цените на храната предизвикан од повеќемесечната војна на Блискиот Исток.
САД и Иран соопштија дека постигнале привремен договор за повторно отворање на овој пловен пат, што би можело да го запре конфликтот во кој загинаа илјадници луѓе и кој ја наруши глобалната трговија. Претставници на двете земји ќе се сретнат на 19 јуни во Швајцарија за формално да го потпишат договорот, што укажува дека одредени детали од договореното сè уште не се конечно усогласени.
Што може да направи „Енвидија“ за повторно да ги привлече инвеститорите
Најголемиот предизвик не е да станете највредната компанија во светот, туку да останете на врвот. Компанијата „Енвидија“ (Nvidia Corp.) продолжува да остварува одлични резултати на сите полиња, а растот на нејзиниот профит предизвикува завист во индустријата на чипови. Сепак, некако тоа повеќе не е доволно. Цената на акциите на компанијата оваа година значително заостануваат зад другите производители на полупроводници, бидејќи инвеститорите почнаа да бараат помалку истакнати победници во актуелниот бум на вештачката интелигенција (ВИ).
Извршниот директор Џенсен Хуанг покажа доза на фрустрација за време на посетата на Тајван, кога на собраните инвеститори им порача дека само „лудаци“ можат да го доведат во прашање повратот на инвестициите во ВИ. Во последно време, најавите на „Енвидија“ главно повеќе ја зголемуваат вредноста на акциите на други компании отколку на сопствените. Еве неколку области во кои пробив би можел повторно да ги загрее инвеститорите за „Енвидија“.
.webp){kind=icon}
