Месечниот извештај за потрошувачките цени во САД нема да ги убеди Федералните резерви (Фед) дека сега е вистинското време да започнат со намалување на каматните стапки, според „Блумберг економикс“.
Основниот индекс на потрошувачки цени, кој ги исклучува цените на храната и енергијата, најверојатно пораснал за 0,3 отсто во февруари, изјавија економистите на „Блумберг економикс“ Ана Вонг и Стјуарт Пол. На месечна основа, тие сметаат дека инфлацијата достигна 3,7 отсто, што е најниско од април 2021 година.
„Генерално, не очекуваме извештајот за инфлацијата во февруари да обезбеди доволно аргументи за Фед дека дезинфлацијата е доволно напредната за да иницира намалување на стапката“, велат Вонг и Пол. „Сепак, ова може да се случи веќе во мај, а тоа е нашето основно сценарио бидејќи инфлацијата и пазарот на трудот продолжуваат да се ладат“, додаваат економистите.
Потрошувачките цени (сина линија - проекции) и базичниот индекс на инфлација (црвени столпчиња) во САД на месечна основа
Bloomberg
Тие исто така сметаат дека необичниот скок на индикаторот OER (кој го мери односот на наемнината и каматите за станбен кредит, н.з.), најголемиот поединечен показател во рамките на индексот за потрошувачки цени, бил исклучок.
Во јануари скокот на OER од 0,6 отсто ги изненади аналитичарите и го доведе во прашање напредокот што централните банкари го постигнаа во борбата против инфлацијата во втората половина на 2023 година. Самата агенција за статистика последователно соопшти дека еден дел од скокот е резултат на промената на пондерирањето на одредени податоци, така што не може да се зборува само за скок на цените.
Вонг и Пол рекоа дека очекуваат и цената на наемнината и OER да пораснат за помалку од 0,4 отсто во февруари, а тој раст ќе забави уште повеќе во следните месеци.
„Трендовите за изнајмување покажуваат дека и OER и самите наемнини веројатно се движат кон побавен раст како што одминува годината. Вкупниот показател, индексот на цените на становите, до крајот на годината треба да падне на годишно ниво од четири отсто“, додаваат оттаму.
„Исто така падот на цените на некои стоки, особено на новите и користените автомобили, треба да продолжи да придонесува за процесот на дезинфлација“, рекоа Вонг и Пол. Нивните очекувања се слични на консензусот од истражувањето на „Блумберг“ меѓу економистите.
.webp){kind=icon}
