.webp){kind=icon}
Членот на Советот на гувернери на Федералните резерви (Фед), Кристофер Волер, рече дека нема брзање за намалување на каматните стапки, истакнувајќи дека неодамнешните економски извештаи го оправдуваат одложувањето или намалувањето на бројот на кратења за годинава.
Волер ги нарече неодамнешните податоци за инфлацијата „разочарувачки“ и рече дека сака да види „барем неколку месеци во низа подобри податоци за инфлацијата“ пред намалување на каматните стапки. Тој кажа дека економијата е сè уште силна, а пазарот на трудот отпорен и дека Фед има простор да чека и да види дали инфлацијата е на одржлив пат до целта од два процента.
„Според мене, намалувањето на стапките треба да се одложи или да се намали бројот на кратења на каматните стапки“, рече Волер во средата во Економскиот клуб во Њујорк.
Приносите на обврзниците скокнаа додека пазарите ги анализираа коментарите на Волер, при што приносот на двегодишните обврзници (чувствителни на коментарите за монетарната политика) се зголеми за четири базични поени. Од почетокот на годината приносот на двегодишниот долг е зголемен за повеќе од 35 базични поени.
Крис Волер
Bloomberg
„Гледам дека економскиот раст и пазарот на трудот сè уште не забавуваат, додека процесот на дезинфлација е забавен“, рече Волер. „Поради овие показатели, не гледам причина да се брза со олеснување на монетарната политика“, додаде тој.
Претставниците на Фед, кои од јули ги држат каматните стапки на највисоко ниво во последните две децении, дебатираат кога и до кој степен да ги намалат трошоците за задолжување годинава. Претседателот на Фед, Џером Пауел, рече дека времето на првото намалување ќе биде многу важно и ги повика сите да бидат трпеливи.
Волер во текот на својот говор четири пати ја употреби фразата „без брзање“, а токму таа фраза ја стави и во насловот. Пазарите очекуваат првото намалување да дојде во јуни.
Членот на Советот на гувернери рече дека неодамна објавените економски податоци „сугерираат дека е разумно да се задржи оваа стапка на сегашното рестриктивно ниво можеби подолго од планираното, за да се одржи инфлацијата на вистинскиот пат, до целта од два процента“.
Во нивните нови прогнози објавени месецов, централните банкари дадоа просечна прогноза за три намалувања на каматните стапки за 2024 година. Сепак, официјалните лица се поделени: девет од 19 функционери предвидуваат две намалувања или помалку. Рафаел Бостик, член на Федералниот комитет за отворен пазар, кој има право да гласа на состаноците за монетарната политика, рече дека очекува само едно намалување на каматните стапки.
