Кинеската централна банка одлучи да не ги менува каматните стапки десетти месец по ред и покажа претпазливост во давањето поддршка на економијата поради вишокот ликвидност и можното слабеење на јуанот.
Народната банка на Кина ја задржа каматната стапка на едногодишните заеми на 2,5 отсто, како што очекуваа аналитичарите анкетирани од „Блумберг“. За да спречи вишок ликвидност, банката повлече 55 милијарди јуани (7,6 милијарди долари) од банкарскиот систем.
Одлуката покажува дека монетарните власти повеќе се грижат за стабилноста на валутата отколку за пониските трошоци за задолжување. Да потсетиме, економското закрепнување на втората по големина економија во светот не оди како што најавија официјалните лица.
Доцнењето на помошта за економијата би можело да ги намали надежите за монетарно олеснување што ги задржа приносите на обврзниците блиску до најниските две децении.
Bloomberg
„Намалувањето на каматните стапки ќе биде од корист за економијата во моментот“, бидејќи кредитирањето е забавено, рече Лин Сонг, главен економист за кинеските пазари во „ИНГ банк“. „Веројатно Народната банка одлучи да ги остави каматните стапки на исто ниво поради нејзиниот главен приоритет, а тоа е стабилноста на девизниот курс на јуанот во моментов“, додаде тој.
Покрај курсот на јуанот, банката ќе мора да ги земе предвид нето-каматните маржи на банките кога ќе одлучува дали да ги намали трошоците за задолжување, според два одделни извештаи на државните медиуми во Кина.
Закрепнувањето на кинеската економија не оди добро. Податоците објавени во текот на денот покажаа дека индустриското производство го забави растот во мај, иако продажбата на мало позитивно ги изненади аналитичарите.
И покрај обидите на Владата преку емисија на обврзници да собере средства за инфраструктурни проекти, долгогодишната криза на пазарот на недвижности продолжува. Цените на становите во мај паднаа и повеќе од очекуваното.
Извозот порасна повеќе од очекуваното во мај, а инфлацијата забрза, но побавно од очекуваното. Од друга страна, активноста во фабриките минатиот месец неочекувано падна.
Курсот на јуанот се стабилизира во Кина и на другите пазари по објавувањето на одлуката на банката. Приносот на 10-годишните обврзници не се промени многу и изнесува 2,26 отсто.
Според последното истражување спроведено од „Блумберг“, економистите за Кина очекуваат економски раст од 4,9 отсто за годинава. Тоа е блиску до целта од пет проценти што ја постави кинеската влада, иако аналитичарите велат дека ќе бидат потребни дополнителни мерки за поддршка на економијата за да се постигне таа цел.
.webp){kind=icon}