text size
Фјучерсите на берзанските индекси пораснаа, а нафтата ги намали добивките откако „Волстрит журнал“ објави дека претседателот Доналд Трамп им рекол на советниците дека е подготвен да ја прекине американската воена кампања против Иран дури и ако Ормускиот Теснец остане во голема мера затворен.
Фјучерсите на индексот S&P 500 пораснаа за 0,9 отсто, додека оние за европските акции укажуваат на раст од 0,4 отсто на отворањето, откако расположението се подобри по извештајот на „Волстрит журнал“. Закрепнувањето на азиските акции, сепак, ослабе, при што индексот MSCI Asia Pacific падна за 1 отсто и е на пат кон најлош месец од октомври 2008 година.
Вест тексас намали поголемиот дел од добивките и се тргуваше околу 103 долари за барел, бидејќи инвеститорите се обложуваат на намалување на тензиите на Блискиот Исток. Суровината претходно се искачи речиси до 107 долари за барел. Државните обврзници на САД ги продолжија добивките, а доларот ослабе во однос на повеќето валути од групата Г10 по извештајот.
Острите движења следуваа по слабиот почеток на тргувањето со акции и скок на цените на нафтата, откако Иран нападна кувајтски танкер за сурова нафта во Дубаи.
Повлекување на САД од конфликтот би помогнало да се намалат тензиите и да се подобрат изгледите за повторно отворање на Ормускиот Теснец - клучна артерија чие нарушување ги турна цените на нафтата нагоре. Обновувањето на испораките од Блискиот Исток би им користело на големите увозници во Азија, како Индија и Кина, и би помогнало да се намалат стравувањата од забавување на глобалниот економски раст.
Серија падови
S&P 500 со најдолга негативна низа од 2022 година
Извор: Bloomberg
„Краткорочно, крајот на војната би бил добредојден развој“, изјави Тим Вотерер, главен пазарен аналитичар во КЦМ (KCM Trade). „Но ако Ормускиот Теснец остане затворен, глобалните енергетски пазари ќе останат изложени на дополнителни нарушувања во снабдувањето.“
Во последните денови Трамп и неговите советници процениле дека операција за отворање на Ормускиот Теснец би го продолжила конфликтот над неговата временска рамка од четири до шест недели, објави „Волстрит журнал“, повикувајќи се на неименувани претставници од администрацијата.
Во изминатиот месец Трамп јавно изнесуваше различни ставови за тоа како да се справи со затворањето на поморскиот пат, како дел од поширок образец на давање спротивставени цели и насоки за војната. Во одредени моменти се закануваше со бомбардирање цивилна енергетска инфраструктура доколку каналот не биде повторно отворен до одреден рок. Во други наврати ја намалуваше важноста на теснецот за САД и велеше дека неговото затворање е проблем што треба да го решаваат други држави.
„Ризичните средства чекаа каков било изговор за раст“, изјави Ана Ву, стратег за повеќе класи на средства во „Ван Ек“ (VanEck Associates Corp.). „Затоа промената на наративот дејствува како адреналин за расположението. Сепак, ова сè уште не е усогласено ниту конечно. Можеби е прерано да се постави како основно сценарио.“
По еден месец борби, може да се каже дека токму Иран обезбеди најзначајна стратешка предност - посилна контрола врз сообраќајот низ Ормускиот Теснец. Досега во март, во просек, едвај шест брода дневно минувале низ тесниот поморски пат што го поврзува Персискиот Залив со светот, во двата правца. За споредба, во нормални услови таа бројка изнесува околу 135 дневно.
Што велат стратезите на „Блумберг“...
„Инвеститорите сериозно се насочуваат кон надежите за пат кон мир. Слични бранови оптимизам се менуваа кога Трамп или Иран, или и двете страни, сигнализираа дека војната ќе продолжи да се одолжува. Но засега, барем на краток рок, преовладува оптимизмот.“
- Гарфилд Рејнолдс, лидер на тимот МЛИВ за Азија.
Американските државни обврзници пораснаа по извештајот на „Волстрит журнал“, при што приносот на референтните 10-годишни обврзници се намали за два базични поена, на 4,33 отсто. Хартиите од вредност пораснаа и во понеделникот, откако претседателот на Фед, Џером Пауел, го намали значењето на краткорочните инфлациски ризици од повисоките цени на енергијата.
Златото порасна за 1 отсто и се тргуваше околу 4.550 долари за унца, додека среброто скокна за 2,7 отсто.
Нестабилноста предизвикана од конфликтот со Иран доведе до најголемиот месечен пад на вредноста досега. Дина Тинг, раководителка за управување со глобални индексни портфолија во „Франклин Темплтон“ (Franklin Templeton), вели дека клуч за снаоѓање во овој „маничен“ период е диверзификацијата.
Во меѓувреме трговското одделение на „Голдман Сакс“ (Goldman Sachs Group Inc.) соопшти дека почнуваат да се појавуваат знаци на капитулација кај хеџ-фондовите, а систематските инвеститори го губат замавот. Се очекува инвеститорите што ги следат трендовите, познати како CTA, да бидат купувачи во секое сценарио во наредниот месец.
Американските акции направија остар пресврт во понеделникот, продлабочувајќи ја распродажбата што ја поттикна најдолгата неделна низа загуби од 2022 година, поради стравувањата од ескалација на војната откако во Иран пристигнаа дополнителни американски трупи.
Nasdaq 100 се тргува околу 12 отсто под рекордното ниво од октомври. Падот беше поттикнат од стравувањата дека растот на цените на нафтата поради војната на Блискиот Исток може да го задуши економскиот раст и повторно да ја разгори инфлацијата. Индексот S&P 500 беше на помалку од 1 отсто од влегување во корекција.
Некои од инвеститорите оценуваат дека овие движења се дел од тековната нестабилност наместо знак за суштинско намалување на ризикот, сè додека не се направат поконкретни отстапки или не се појави јасен крај на конфликтот.
„Ги гледам најновите наслови како потенцијален поттик за краткорочна нестабилност“, изјави Дилин Ву, стратег во „Пеперстоун“ (Pepperstone). „Но прерано е да се толкуваат како сигнал дека конфликтот завршува. Некои од овие сигнали можеби само одразуваат стратегија за управување со пазарните очекувања и стабилизирање на финансиските услови.“
Главни движења на пазарите:
Акции
- Фјучерсите на S&P 500 пораснаа за 0,9 отсто во 12:52 часот по токиско време
- Јапонскиот Topix падна за 0,5 отсто
- Австралискиот S&P/ASX 200 порасна за 0,8 отсто
- Хонгконшкиот Hang Seng падна за 0,4 отсто
- Shanghai Composite падна за 0,4 отсто
- Фјучерсите на Euro Stoxx 50 пораснаа за 0,4 отсто
Валути
- Индексот Bloomberg Dollar Spot беше речиси непроменет
- Еврото беше речиси непроменето на 1,1469 долари
- Јапонскиот јен беше речиси непроменет на 159,72 за долар
- Офшор јуанот беше речиси непроменет на 6,9147 за долар
Криптовалути
- Биткоинот порасна за 1,6 отсто, на 67.684,54 долари
- Етерот порасна за 2,2 отсто, на 2.066,25 долари
Обврзници
- Приносот на 10-годишните американски државни обврзници се намали за два базични поена, на 4,33 отсто
- Приносот на 10-годишните јапонски обврзници се намали за два базични поена, на 2,340 отсто
- Приносот на 10-годишните австралиски обврзници се намали за осум базични поена, на 4,99 отсто
Суровини
- Вест тексас порасна за 0,2 отсто, на 103,09 долари за барел
- Спот златото порасна за 1 отсто, на 4.554,69 долари за унца
.webp){kind=icon}
