Воен образец на индексот S&P 500: падот почнува секој четврток

Пет недели по започнувањето на војната на Блискиот Исток, која ја потресе глобалната економија, американскиот пазар на акции се подредува на предвидлив образец. Неделата започнува со силен раст, во средината на неделата има застој, а потоа, како по часовник, секој четврток и петок бележи пад.

Слична динамика, повеќе или помалку, се забележува и на европските пазари, на пазарите во развој, па дури и кај некои американски државни обврзници. Сепак, тоа е особено изразено кај индексот S&P 500. Откако започна војната со Иран, индексот имаше кумулативни добивки во првите три дена од неделата, но вкупно падна за девет отсто во четвртоците и петоците.

Причината, велат експертите, е едноставна. Викендот претставува период од два или три дена кога инвеститорите не можат да тргуваат. За тие два дена во војна можат да се случат многу работи што дополнително би можеле да ја погодат глобалната економија, особено имајќи ја предвид склоноста на американскиот претседател Доналд Трамп да презема големи чекори додека пазарите се затворени. Затоа многу инвеститори претпочитаат да ги намалат своите удели во акции кон крајот на неделата.

„Влегувањето во прекин на тргувањето со непознати ризици е загрижувачка помисла“, вели Џо Гилберт, менаџер на портфолија во компанијата ИАМ (Integrity Asset Management). „Полесно е да се намали ризикот пред викендот отколку да се задржат позициите.“

 

Биковскиот сентимент на почетокот на неделава беше особено изразен, при што индексот S&P 500 порасна за повеќе од три отсто поради оптимизмот дека Доналд Трамп сака да ги извлече САД од конфликтот што го започна.

Меѓутоа, во средата вечер тој оптимизам брзо исчезна, кога Трамп во телевизиско обраќање најави продолжување на бомбардирањето на Иран во следните неколку недели, што ќе го „врати во каменото време, каде што му е местото“. Терминските договори на S&P паднаа за еден отсто, додека цените на нафтата скокнаа, што укажува дека акциите, повторно, се подготвени за пад в четврток.

Оптимизмот, вели Стив Сосник, главен стратег во компанијата ИБ (Interactive Brokers), обично се заменува со избегнување ризик „додека неделата одминува“.

Обраќањето на Трамп до нацијата се вклопи во образецот што се повторува откако САД и Израел ја започнаа кампањата на бомбардирање, осцилирајќи меѓу тврдења за скорашна победа и закани за значителна ескалација на нападите врз Иран. Претходно во текот на денот тој користеше сличен речник, најавувајќи дека ќе продолжи „да го уништува Иран до исчезнување“ сè додека Ормускиот Теснец, клучната транзитна точка за извоз на нафта од Блискиот Исток, повторно не се отвори. Иранските официјални лица ја отфрлија заканата, нагласувајќи дека нема да се плашат од „апсурдните испади“ на Трамп.

Со цени на нафтата што сè уште се високи и без непосредни знаци за прекин на огнот, Сосник е скептичен дека добивките оваа недела се одржливи како оние што се забележани на почетокот на другите недели. „Мислам дека трендот на пад продолжува“, рече тој, „сè додека не се случи уверливо враќање што личи на нормала“.