Во кои акции инвестираат семејствата на македонските политичари - на списокот се и величествените 7

Податоците за имотната состојба на македонските политичари откриваат дека тие главно вложуваат во недвижности - станови, куќи, земјоделско, градежно земјиште... На пријавените анкетни листови има од сѐ по нешто.

Љубители се и на автомобили, некои пријавиле и оружје, скапоцен накит, вредни уметнички дела. Најчесто штедат во банка, а најголем дел од нив има и долгови. Ние одлучивме да провериме кој од именуваните функционери вложува во хартии од вредност. Во време кога пазарите се соочуваат со турбуленции, но носат и значајна заработка во последните години, разгледавме кој има чувство за долгорочна заработка, но и кој верува во домашниот пазар на капитал. 

Македонското собрание има 120 пратеници, а Владата дваесетина министри. Ретко кој од нив игра на берзите, а тие што пријавуваат вакви приходи, најчесто ги пријавуваат во име на семејството. Значи, „Блумберг Адрија“ внимателно ги провери имотните листови на македонските пратеници и членовите на Владата. Најимпресивно портфолио поседува сопругата на пратеникот Антонио Милошоски.

Акции во „Енвидија“, „Амазон“, „Мајкрософт“, ЕТФ 

Поранешниот министер за надворешни работи и сегашен пратеник Антонио Милошоски на свое име има 230 акции во „Комерцијална банка“, кои ги добил како подарок во 2024 година. Тој има и животно осигурување од 2012 година. За разлика од него, неговата сопруга Симона е одличен берзански играч од порано.

Таа има акции во најголемите домашни банки, во „Комерцијална банка“ 81 акција и во НЛБ 38 акции. Сепак, во последните две години направила извонреден „шопинг“. На домашен пазар се стекнала со 1.408 акции, а во своето портфолио ги вметнала и технолошките гиганти од групата седум величествени. Инвестирала во 44 акции во „Енвидија“, 8 акции во „Мајкрософт“ и 11 акции во „Амазон“.

Мајката на четири деца го диверзифицирала своето портфолио инвестирајќи и во ЕТФ-ови. Има 54 акции  во „Вангард“ (Vanguard S&P 500 ETF) - еден од најпопуларните нискоценовни индексни фондови, чија цел е да ја следи изведбата на индексот S&P 500.

Таа има и 70 акции во „Ес-ес енерџи селект сектор“ (SS Energy Select Sector), специјализиран фонд за инвеститори што сакаат директна изложеност на американскиот енергетски сектор.

 

Домашните банки, „Телеком“ и „Гранит“ - најинтересни

Опозицискиот лидер и пратеник Венко Филипче има златна виза во Дубаи, но имотниот лист покажува дека не инвестирал таму, туку во соседна Бугарија. Неврохирургот во ноември 2022 година ја основал фирмата „Пауер И8“ (POWER i8 Ltd). Компанијата се занимава со купување, изградба и продажба на недвижности, но и други дејности.

Филипче од 2008 година има удел во „Макпетрол“, 215 акции во „Макстил“, 55 акции во „Стопанска банка“ од Скопје и 40 акции во градежната компанија „Гранит“.

Акции во „Гранит“ има и министерот за локална самоуправа Златко Перински. Тој стекнал 167 акции таму и 7 акции во „Топлификација“ во 2007 година. Неговите родители имаат 201 акција во „Цементарница“ од 1998 година.

Во „Гранит“ 410 акции од 2009 година поседува и пратеникот од ВМРО-ДПМНЕ Љупчо Пренџов.

Неговата сопартијка Каролина Насковска и нејзиното семејство поседуваат 126 акции во „Комерцијална банка“. Од нив, 83 се на децата, 13 на сопругот и 30 нејзини. Годинава пријавила и 810 акции во „Македонски телеком“ на име на децата.

Во оваа компанија од 2006 година 466 акции поседува поранешниот премиер и сегашен пратеник Димитар Ковачевски. Неговата сопруга лани купила 51 акција во „Дојче телеком“.

Удели во домашни фондови

Генералниот секретар на ВМРО-ДПМНЕ, пратеникот Драган Ковачки, нема хартии од вредност, но неговото семејство инвестирало во удели во „КБ инвест“ во 2023 година. Сопругата поседува 573, децата 156 и 342 удели.

И сопругата на министерот за правда Игор Филков има удели во „КБ инвест“ во вкупна вредност од 600.000 денари. Таа има и животно осигурување во „Кроација“ со номинална вредност од 19.792 евра. Децата на министерот имаат удели во инвестицискиот фонд ВФП во вредност од 13.037 евра.

Во истиот фонд удел има и министерката за образование Весна Јаневска во номинална вредност 378.939 денари.

Обврзници и наследства

Во 2023 година државата за првпат емитуваше граѓански обврзници со номинална вредност од 10.000 денари и каматна стапка од 5 отсто годишно. Министерот за јавна администрација Горан Минчев тогаш се стекнал со 85 обврзници.

Хартии од вредност пријавил пратеникот од ВМРО-ДПМНЕ Зоран Коцевски. Тој во 2023 година наследил 320 акции од „Алкалоид“.

Наследство од 55 акции во „ЖАС Скопје“ во 1996 година добиле и родителите на пратеничката Моника Зајкова. Лично, претседателката на ЛДП не поседува хартии од вредност.

Хартии од вредност не поседува ни поранешниот министер за транспорт и актуелен пратеник од СДСМ, Благој Бочварски, но во неговиот имотен лист е наведено дека неговите родители оствариле нето-приход од дивиденда во вредност од 10.149.440 денари (165.000 евра).