Додека акциите на чипови го забележаа најлошиот ден во повеќе од две недели, се појавија знаци дека дел од трговците се обложуваат оти распродажбата ќе биде краткотрајна.
Индексот на полупроводници во Филаделфија (SOX), кој ги вклучува водечките компании од секторот на чипови како „Енвидија“ (Nvidia Corp.), „Интел“ (Intel Corp.) и „АМД“ (Advanced Micro Devices Inc.), закрепна од најниските нивоа на почетокот на тргувањето, кога беше во минус од дури 6,3 отсто, и четвртокот го заврши со пад од околу два отсто. Падот беше поттикнат од разочарувачката прогноза за продажбата на ВИ-чипови на „Бродком“ (Broadcom Inc.), што ги повлече акциите на компанијата надолу за речиси 13 отсто и го означи нивниот најголем пад од почетокот на 2025 година.
Но за оние кои стравуваа дека ја пропуштиле можноста додека акциите на чипови силно растеа, поради што индексот SOX речиси се удвои од крајот на март, ова претставуваше можност за купување по пониски цени, изјави Кристофер Џејкобсон, ко-раководител за стратегија за деривати во „Саскехана интернешнл груп“ (Susquehanna International Group).
Тој посочи дека клиентите ја искористиле можноста да продаваат продажни (put) опции на погодените акции на чипови, од „Бродком“ до „Микрон технолоџи“ (Micron Technology Inc.), што во суштина претставува облог дека цените ќе растат.
„Очигледно е дека некои трговци чекаа, надевајќи се на корекција за да купат акции по падот“, рече тој.
Падот во четвртокот привремено го запре силниот раст што ги поттикна стравувањата за создавање ВИ-меур. Сепак, таквите стравувања се појавуваа и претходно, а индексот на чипови, по неколку корекции во последните два месеца, продолжи да расте додека инвеститорите бркаа повисоки приноси.
„Расположението утрово донекаде се влоши откако прогнозата на ‘Бродком’ за ВИ-чипови разочара, иако е можно тие стравувања да спласнале штом трговците сфатиле дека станува збор за проблем специфичен за компанијата, а не за поширок проблем што го погодува целиот сектор на чипови“, изјави Колтон Лодер, извршен директор во компанијата за алтернативни инвестиции „Кохало“ (Cohalo).
Џејкобсон од „Саскехане“ (Susquehanne) вели дека искусните инвеститори сега се насочуваат кон поединечни акции за преземање долги позиции, додека фондовите со кои се тргува на берза (ЕТФ) ги користат за заштита на своите позиции, што одразува одредена загриженост поради можен пресврт на трендот. Сепак, врз основа на активноста во четвртокот, тој не смета дека тоа е сигнал дека ентузијазмот за вложувања во ВИ исчезнува.
„Инвеститорите во последно време остварија значителни добивки од акциите на чипови“, рече тој, „па затоа се свртуваат кон ЕТФ-производи за заштита од ризик.“
.webp){kind=icon}
