Продолжува песимизмот на американските берзи

Новата недела не донесе промена во расположението на инвеститорите на американските берзи, каде што минатонеделната распродажба на акциите продолжи и во понеделникот. Индексот Dow Jones, кој во петокот падна на најниското ниво од ноември 2020 година, продолжи со падот и на почетокот на оваа седмица падна за дополнителни 1,1 отсто, на ниво од 29.260,81 поени на затворањето.

Сличен тренд забележаа и индексот S&P 500, кој го заврши денот на 3.655,04 поени, еден процент помалку од петокот, а вредноста на технолошкиот Nasdaq индекс падна за 0,6 отсто, на 10.802,92 поени.

Причините за лошото расположение на инвеститорите лежат пред сè во намерите на функционерите на Федералните резерви (ФЕД), кои во понеделникот јасно ставија до знаење дека зголемената нестабилност на светските берзи во последно време нема да ги одврати да продолжат да ги зголемуваат каматните стапки за да ја смират инфлацијата. Светските пазари на пари и капитал, кои веќе беа во состојба на превирања, дополнително флуктуираа во петокот, откако новата британска влада на премиерката Лиз Трас го објави правецот на нејзината економска политика.

Веста резултираше со распродажба на британските државни обврзници и пад на вредноста на британската фунта, што продолжи и во понеделникот. Така, во понеделникот фунтата достигна историски ниско ниво во однос на американскиот долар, кој, пак, ја допре својата највисока вредност во последните две децении во однос на кошницата од шест валути.

Фунтата во еден момент падна на ниво од 1,0327 американски долари, а економистите сега проценуваат дека се зголемуваат шансите двете валути да се најдат во паритет. Падот на фунтата е предизвикан од намерите на британските власти да ги намалат даноците, што ќе значи дека од друга страна ќе треба да го зголемат задолжувањето со највисока стапка во последните педесет години.

Евтини нафта и злато

Освен на берзите, инвеститорите не можеа да најдат утеха ниту на нафтениот пазар, каде во понеделникот цената на барелот падна на најниско ниво во последните девет месеци. Во еден момент барел нафта WTI се тргуваше под цената од 76,50 долари, а во вторникот наутро цената беше само за еден долар повисока. И цената на златото падна на најниско ниво во последните две и пол години. Една унца злато се тргува на ниво од околу 1.625 долари, што е цена по која златото последен пат се тргуваше во април 2020 година.

Инвеститорите сè уште се загрижени до каде ќе оди забавувањето на економијата на сметка на зголемените каматните стапки, а нивното расположение би можело да се подобри само доколку има повеќе вести за стагнација или пад на цените, што, барем во догледна иднина, може да значи и олабавување на монетарната политика.

Во моментов нема коментари за веста. Биди прв да коментира...

Остави коментар