Нафтата поскапе по новите напади на САД врз Иран, пазарите очекуваат потег на Фед

Нафтата поскапе, а државните обврзници ослабеа откако САД и Иран започнаа нов бран напади, со што дополнително ги заострија тензиите на Блискиот Исток. Во исто време, цените на златото и среброто се намалија.

Брент поскапе за 1,2 отсто, на 78,94 долари за барел и е на пат да ја забележи третата последователна дневна добивка, откако американската војска изврши уште еден бран напади врз Иран. Азиските акции го намалија претходниот раст и напредуваа за 0,1 отсто, бидејќи растот на акциите на производителите на чипови изгуби замав. Фјучерсите на американските берзански индекси беа речиси непроменети, откако се движеа меѓу добивки и загуби.

Државните обврзници паднаа во Јапонија, Австралија и Нов Зеланд, продолжувајќи го глобалниот пад на пазарот на долг поради очекувањата дека Федералните резерви ќе ги зголемат каматните стапки за да ја ограничат инфлацијата. Американските државни обврзници беа речиси непроменети во азиското тргување, откако приносот на двегодишните обврзници, кој е најчувствителен на монетарната политика, во средата се приближи до највисокото ниво оваа година.

Златото поевтини четврти ден по ред и се тргуваше околу 4.060 долари за унца, бидејќи изгледите за повисоки каматни стапки ја намалија привлечноста на металот кој не носи принос. Среброто падна за 0,8 отсто, на 57,85 долари за унца.

Приносот на двегодишните американски обврзници се приближува до највисокото ниво во 2026 година

Bloomberg

Новото разгорување на тензиите на Блискиот Исток и растот на цените на нафтата повторно ги разгореа стравувањата од инфлација, поради што пазарите на пари во средата ги поместија очекувањата за следното зголемување на каматните стапки на Фед од декември на октомври. Тоа дополнително го засили притисокот врз пазарите, кои веќе се соочуваат со високи вреднувања на акциите по овогодишниот раст предводен од компаниите поврзани со вештачката интелигенција.

„Тргувањето во услови на хаос повторно е во игра, а нафтата, златото и безбедните засолништа повторно се во центарот на вниманието“, изјави Хебе Чен, пазарен аналитичар во „ВГП“ (Vantage Global Prime).

Трговците и натаму се насочени кон пазарот на обврзници по распродажбата во средата.

Записникот од состанокот на Фед од 16 и 17 јуни, објавен во средата, покажа дека неколку членови на Комитетот сметале дека има основа за зголемување на каматните стапки, иако на крајот ја поддржале одлуката тие да останат непроменети.

Можноста повисоките цени на нафтата да ја задржат инфлацијата на покачено ниво ги обликува очекувањата за монетарната политика уште откако САД го нападнаа Иран кон крајот на февруари, што предизвика шок во понудата. Ветеранот меѓу пазарните стратези Ед Јардени исто така оцени дека нарушувањето на прекинот на огнот меѓу САД и Иран носи ризик од ново забрзување на растот на цените, што би можело да го принуди Фед повторно да ги зголеми каматните стапки.

Иако референтните цени на нафтата и натаму се значително под највисоките нивоа достигнати кон крајот на март, тие пораснаа во последните денови откако повторно избувнаа борбите меѓу САД и Иран, а претседателот Доналд Трамп изрази сомнеж во одржливоста на прекинот на огнот.

Во меѓувреме, сообраќајот низ Ормузскиот Теснец речиси целосно запре во четвртокот, откако САД втор ден по ред извршија напади врз Иран.

Податоците за следење на пловидбата покажуваат дека движењата во најважниот светски енергетски поморски премин главно се одвивале по рута одобрена од Иран, поблиску до северниот дел на теснецот, додека коридорот што го поддржуваат САД и Оман останал тивок.

„Суровата нафта повторно ја презеде улогата на главен двигател на движењата на различните класи на средства, бидејќи повторно се разгоруваат тензиите меѓу САД и Иран“, напиша во белешка Дилин Ву, стратег во „Пеперстоун Груп“ (Pepperstone Group).

„Ако нафтата продолжи да поскапува и со себе ги повлече нагоре инфлациските очекувања, ќе растат и приносите на американските државни обврзници. Тоа го става Фед во сè понезавидна позиција.“

Најважно од компаниите:

• Побарувачката за американската котација на „СК Хајникс“ (SK Hynix Inc.) е повеќе од седум пати поголема од понудата, според лица запознаени со постапката, додека јужнокорејскиот производител на мемориски чипови се подготвува во четврток да ја одреди цената на понудата.
• Кина планира да им дозволи на водечките компании за вештачка интелигенција да купуваат ограничени количини чипови H200 од „Енвидија“ (Nvidia Corp.), што, според „Информејшн“ (The Information), укажува на олеснување на ограничувањата за оваа барана американска технологија.
• „ШИКС“ (Shanghai Iluvatar CoreX Semiconductor Co.) обезбеди околу 902 милиони долари преку продажба на акции во Хонг Конг, откако нејзината акција нагло поскапе по иницијалната јавна понуда во јануари.
• Кинескиот развивач на модели за вештачка интелигенција „Жипу“ (Zhipu) ја одреди цената на продажбата на акции во вредност од четири милијарди долари на долниот праг од претходно понудениот ценовен опсег.