Нарушувањата во понудата на пазарот на какао ќе продолжат откако Гана ја зголеми цената

Гана ја зголеми откупната цена на какаото за земјоделците за сезоната 2026-27 година, откако цените на фјучерсите закрепнаа; со тоа таа се издвои од соседот - Брегот на Слоновата Коска, која претходно овој месец ја задржа откупната цена непроменета.

Зголемената разлика во цените може да ги поттикне земјоделците од Брегот на Слоновата Коска – најголемиот светски производител – да шверцуваат зрна какао во соседните земји во потрага по повисока заработка. Ова потенцијално би можело да го наруши протокот на какао кон меѓународниот пазар и да придонесе цените да продолжат да растат.

Производителите на какао во земјата што е втор најголем светски производител ќе добиваат 42.400 седи (3.647 долари) по тон за новата берба што започнува во петок. Ова претставува зголемување од 2,4 проценти во однос на цената од 41.392 седи што се применуваше од февруари, изјави Ренди Аби, извршен директор на Одборот за какао на Гана, пред новинарите во главниот град Акра. За споредба, Брегот на Слоновата Коска моментално плаќа 2.084 долари по тон.

Оваа корекција е во согласност со целта на Гана да обезбеди земјоделците да добиваат најмалку 70 проценти од извозната цена по условите „франко брод“ (FOB), со што ефективно се утврдува минимална откупна цена. Новата цена изнесува 71,8 проценти од вредноста „франко брод“, рече Аби.

 

Гана првично постави цел за производство од 650.000 тони за сезоната 2025-26, но испораките надминаа 750.000 тони, делумно поради зрната какао шверцувани од соседните земји. Брегот на Слоновата Коска и Гана заедно учествуваат со повеќе од половина во глобалното снабдување со какао.

Меѓународните цени на какаото се во пораст од февруари поради очекувањата дека родот во Западна Африка за сезоната 2026-27 ќе биде помал поради болести на културите и неповолни временски услови. Регионот би можел да биде погоден и од силниот феномен Ел Нињо, кој може да донесе периоди на големи поплави или суши. Во февруари, фјучерсите за какао во Њујорк паднаа на најниското ниво за оваа година поради слабеењето на глобалната побарувачка, што ја поттикна Гана да ја намали откупната цена за околу една третина, на 41.392 седи по тон. Оттогаш, вредноста на фјучерсите речиси е двојно зголемена и тие се тргуваат по цена од околу 5.600 долари за тон.