„Величествените седум“ го губат приматот на пазарот, ВИ го поттикнува растот на други компании

Со години технолошките гиганти познати како „величествените седум“ го привлекуваа најголемото внимание на инвеститорите, доминираа во индексот S&P 500 и во голема мера го одредуваа правецот на движење на целиот пазар на акции. Тие денови сега се минато.

Додека технолошкиот индекс Nasdaq 100 во 2026 година порасна за речиси 18 отсто, а S&P 500 забележа раст од 10 отсто, индексот што ги следи акциите на „Величествените седум“ порасна за само 1,1 отсто. Тргувањето поттикнато од вештачката интелигенција (ВИ), кое од овие технолошки гиганти - „Енвидија“ (Nvidia Corp.), „Алфабет“ (Alphabet Inc.), „Епл“ (Apple Inc.), „Мајкрософт“ (Microsoft Corp.), „Амазон“ (Amazon.com Inc.), „Мета“ (Meta Platforms Inc.) и „Тесла“ (Tesla Inc.) - направи лидери на пазарот, и натаму трае, но добива поинаква форма.

Инвеститорите сега сè повеќе се насочуваат кон компаниите што ќе имаат најголема корист од вложувањата во ВИ, а истовремено стануваат сè поскептични кон компаниите што ги предводат тие инвестиции. Поради тоа, производителите на мемориски чипови, како „Микрон“ (Micron Technology Inc.) и „Сандиск“ (Sandisk Corp.), избија меѓу најголемите добитници, додека акциите на „Величествените седум“ се потиснати во втор план. Индексот SOX на производителите на полупроводници на Филаделфиската берза порасна за 82 отсто во 2026 година и е на пат да го оствари најдобриот годишен резултат од 1999 година, откако го забележа и најдобриот квартал во својата историја.

Bloomberg

Величествените седум некогаш беа ретка група компании за кои можеше со сигурност да се очекува дека ќе остварат принос значително над пазарниот просек“, изјави Брајан Барбета, копретседател на технолошкиот тим во „Велингтон менаџмент“ (Wellington Management) и еден од портфолио-менаџерите задолжени за стратегијата за глобални иновации. „Сега инвеститорите повеќе се фокусираат на причините поради кои не им се допаѓаат тие компании.“

За да се добие претстава колку брзо се промени ситуацијата, доволно е да се погледне податокот дека во април 40-дневната корелација на групата величествените седум со индексот Nasdaq 100 достигна врв од над 0,95, што претставува речиси совршена усогласеност. Неодамна таа се намали под 0,7, што е нејзино најниско ниво од 2017 година, кога овие компании сочинуваа само 10 до 11 отсто од вредноста на индексот, наведе Џесика Рејб, коосновачка на „Дататрек рисрч“ (DataTrek Research), во извештај до клиентите од 30 јуни.

Сепак, седумте технолошки гиганти и натаму имаат огромно влијание врз пазарот, бидејќи учествуваат со 37 отсто во индексот Nasdaq 100 и сочинуваат речиси една третина од вкупната вредност на индексот S&P 500.

Одвојувањето на величествените седум од поширокиот пазар можеби е најјасниот показател дека инвестициската приказна околу ВИ се менува и се насочува кон нови добитници, особено кон производителите на мемориски чипови. Тие компании веќе извесно време се во фокусот на инвеститорите, но она што сега е поинакво е што секторот главно бележи раст независно од „Енвидија“, некогашниот главен симбол на ВИ-трендот што долго време доминираше на пазарот на акции. Годинава, сепак, „Енвидија“ е третата најслабо рангирана акција во индексот на производителите на полупроводници, со скромен раст од само 4,9 отсто.

Кај останатите шест компании од групата, резултатите се нерамномерни. Три компании бележат раст, а предничи „Алфабет“, благодарение на очекувањата на инвеститорите дека би можела да биде еден од победниците во областа на вештачката интелигенција.

Од друга страна, акциите на „Мајкрософт“ паднаа за 20 отсто, а јуни беше најлошиот месец за компанијата од 2000 година, поради загриженоста на инвеститорите од две причини, големите инвестиции на компанијата во вештачката интелигенција и нејзината изложеност на ризикот што ВИ го претставува за производителите на софтвер.

Како резултат на тоа, инвеститорите во јуни повлекоа 786 милиони долари од „Раундхил величествените седум ЕТФ“ (Roundhill Magnificent Seven ETF), што е најголемиот досега забележан одлив, додека истовремено вложија 9,3 милијарди долари во „Раундхил мемори ЕТФ“ (Roundhill Memory ETF), покажуваат податоците што ги собра „Блумберг“. „Изложеноста на инвеститорите кон технолошките компании со голема пазарна капитализација беше ‘екстремна’ на крајот од мај“, но сега се врати на понеутрално ниво, напишаа стратезите на „Дојче банк“ (Deutsche Bank AG) во белешка од 30 јуни.

Скептицизмот околу масовните инвестиции во ВИ во најголема мера стои зад ова пренасочување на капиталот. „Мајкрософт“, „Амазон“, „Алфабет“ и „Мета“ драматично ги забрзуваат капиталните инвестиции, што врши притисок врз нивните парични текови, додека сè уште не е јасно колку тие вложувања ќе се исплатат.

„Пазарите сега расправаат дали компаниите што обезбедуваат облачни услуги ќе остваруваат помалку атрактивен принос на капиталот и пониски профитни маржи“, изјави Барбета.

Главниот извршен директор на „Мета“, Марк Закерберг, наводно им рекол на вработените на интерен состанок дека развојот на ВИ-агентите во компанијата не напредува со очекуваното темпо. Компанијата, исто така, наводно планира да влезе во бизнисот со облачна инфраструктура и да го продава вишокот компјутерски капацитет. Токму овие инвестиции во ВИ директно се прелеаја кај производителите на мемориски чипови, како „Микрон технолоџи“ и „Сандиск“.

Bloomberg

„Инвеститорите одат таму каде што растот и приносите се најсилни“, изјави Барбета. „Во моментов компании како ‘Микрон технолоџи’ и ‘Сандиск’ не само што бележат побрз раст на добивката, туку добиваат и едни од најсилните позитивни ревизии на проценките.“

Сепак, не сите на Волстрит се убедени дека ова пренасочување на капиталот ќе потрае. Јазот меѓу различните делови од синџирот на вредност на вештачката интелигенција на крајот ќе се намали „кога компаниите што обезбедуваат облачна инфраструктура од голем обем (хиперскејлери), развивачите на ВИ-модели и нивните корисници ќе остварат напредок во монетизацијата, приходите и добивката и ќе почнат да преземаат поголем дел од вкупната вредност што ја создава вештачката интелигенција“, напиша глобалниот пазарен стратег на „ЏП Морган“ (JPMorgan Chase & Co.), Николаос Панигирцоглу, во белешка до клиентите од 1 јули.

Во меѓувреме, се чини дека растот на акциите на производителите на чипови слабее, додека инвеститорите повторно се насочуваат кон секторите што годинава заостануваа, меѓу кои и ВИ-хиперскејлерите, наведува тимот за американска стратегија за акции на „Морган Стенли“ (Morgan Stanley), предводен од Мајк Вилсон. „Ваквата дивергенција (разлика во перформансите меѓу производителите на чипови и технолошките компании, заб. на прев.) не може да продолжи, не е одржлива“, изјави Вилсон.

Сепак, засега нема доволно силен раст на добивката што би им помогнал на големите технолошки компании да го променат сегашниот наратив. Се очекува величествените седум следната година да забележат раст на нето-добивката од 18,9 отсто, додека пред три месеци таа прогноза изнесуваше 21,4 отсто, покажуваат податоците на „Блумберг интелиџенс“ (Bloomberg Intelligence). Од друга страна, проценките за растот на добивката кај производителите на чипови во последните три месеци се зголемени од 34,3 на 48,5 отсто, покажуваат податоците на „Блумберг интелиџенс“.

Поради тоа, акциите на величествените седум веројатно ќе продолжат да заостануваат зад сегашните пазарни лидери и во догледна иднина, смета Марк Леман, потпретседател за комерцијално банкарство во „Ситизенс“ (Citizens Financial Group Inc.).

„Групата и натаму е релевантна, но инвеститорите порано беа целосно уверени во нејзините изгледи, додека сега има повеќе сомнежи и повеќе дебати околу тоа колку воопшто вреди да се плати за нивните акции“, изјави тој. „Нивниот раст на добивката изгледа како втора или трета лига во споредба со компаниите ‘Микрон технолоџи’ и ‘Сандиск’, а очекувањата за тие компании продолжуваат да растат. Тешко е да се види како ‘Величествените седум’ воопшто можат да им конкурираат.“

Најважни вести од технолошкиот сектор

Кварталната добивка на „Самсунг електроникс“ (Samsung Electronics Co.) се зголеми дури 19 пати, што ги поттикна инвеститорите да ја реализираат добивката по овогодишниот раст на акцијата од речиси 150 отсто, во кој веќе беа вградени очекувањата за иден раст поттикнат од вештачката интелигенција.

„Ривиан аутомотив“ (Rivian Automotive Inc.) понуди на продажба 75 милиони акции во обид да го обезбеди сопственото учество во капиталот поврзано со заемот од Министерството за енергетика на САД.

„Тенсент“ (Tencent Holdings Ltd.) продаде акции на „Куаишоу“ (Kuaishou Technology), кинески конкурент на Тикток, во вредност од 1,5 милијарди долари, намалувајќи ги уделите во зрелите интернет-бизниси како дел од стратешкото насочување кон вештачката интелигенција.

„Иксбокс“ (Xbox) на „Мајкрософт“ планира да укине 3.200 работни места, односно да го намали бројот на вработени за околу 20 отсто во текот на следната година, како дел од голема реорганизација со цел да го поттикне растот во секторот на видеоигрите, кој се соочува со тешкотии. „Иксбокс“ ќе продаде и четири свои студија за развој на видеоигри, а започнува и процес на излегување од сопственоста на петто студио.

„Бродком“ (Broadcom Inc.) соопшти дека ќе испорачува нови наменски чипови за „Епл“ (Apple Inc.) во рамки на проширеното партнерство што ќе трае до 2031 година.

Финансиски извештаи

Не се очекуваат позначајни финансиски извештаи од компаниите.