Успехот на шпански инвеститори од школата на Бафет привлекува сè поголемо внимание

Во време кога глобалните пазари се опседнати со акциите поврзани со вештачката интелигенција и брзиот раст, во Шпанија сè поголемо внимание привлекува спротивната инвестициска филозофија - „вредносно инвестирање“ (value investing). Во центарот на ова движење е Франциско Гарсија Парамес, еден од најпознатите европски инвеститори, чиј успех создаде цела генерација следбеници и го претвори Мадрид во неочекуван европски центар на овој инвестициски пристап.

Во кариера долга повеќе од четири децении, Парамес стекна речиси легендарен статус меѓу value инвеститорите благодарение на високите приноси што ги остваруваше од година во година. Неговиот водечки фонд „Кобас Интернасионал“ (Cobas Internacional), кој управува со средства вредни 1,2 милијарди евра, во последните пет години бележи просечен годишен принос од 20 отсто. Претходно, додека работеше во инвестициската куќа „Бестинвер“, неговите резултати често беа споредувани со оние на легендарниот Ворен Бафет.

Неговиот успех инспирираше и други инвеститори да ја прифатат филозофијата „купи евтино и биди трпелив“. Портфолио-менаџери од компании како „Азвалор Асет Менаџмент“ (ААМ), „А&Г Глобал Инвесторс“ (АГ) и „Магаланес Валу Инвесторс“ (МВИ) работеле со Парамес или биле под влијание на неговиот пристап, а во последната деценија во Мадрид се основани најмалку седум специјализирани value инвестициски куќи.

Според Франческо Паганели од „Морнингстар“, ваквата концентрација на инвестициски компании е единствена за Шпанија и директна последица на успехот на Парамес. Во исто време, додека Волстрит е фокусиран на потенцијалот на вештачката интелигенција, традиционалните показатели за вреднување на компаниите, како односот меѓу цената и добивката, сè повеќе паѓаат во втор план.

 

И покрај тоа што во Шпанија многу штедачи и понатаму претпочитаат да инвестираат во недвижности или банкарски депозити, Парамес успеа да изгради лојална заедница следбеници. За нив, вредносното инвестирање не е само стратегија за избор на акции, туку и животна филозофија заснована врз дисциплина, трпение и избегнување на менталитетот на масата. Годинешната инвестициска конференција на „Кобас“ привлече повеќе од 500 посетители, а професорот Марк Бадија од бизнис-школата ИЕСЕ ја спореди атмосферата со фудбалски натпревар исполнет со навивачи.

Самиот Парамес вели дека неговата стратегија се темели на купување потценети компании и долгорочно чекање нивната вистинска вредност да биде препознаена. Тој нагласува дека не се обидува да ја предвиди иднината или да прави макроекономски облози, туку да инвестира во компании чија пазарна цена е пониска од нивната реална вредност.

 

Фондот во последните пет години го надмина индексот Stoxx 600

Bloomberg

Неговата филозофија инспирираше и нова генерација инвеститори. Еден од нив е Питер Смит од „Палм Харбор Капитал“ (ПХК), кој кариерата ја започнал токму во „Кобас“, а денес управува со сопствен инвестициски фонд со поддршка од Парамес. Според него, најдобрите можности се кријат токму во компаниите што повеќето инвеститори ги игнорираат.

И покрај успешните резултати на „Кобас Интернасионал“, кој годинава оствари раст од 21 отсто и се најде меѓу најуспешните фондови, value инвестирањето останува во сенка на технолошките акции и компаниите поврзани со вештачката интелигенција. Според податоците на „Морнингстар“, фондовите што ја следат оваа стратегија денес управуваат со околу 7,5 отсто од вкупните средства во акциски фондови, во споредба со 13 отсто во 2008 година.

Сепак, аналитичарите сметаат дека актуелните сомнежи околу одржливоста на еуфоријата поврзана со вештачката интелигенција би можеле повторно да го насочат вниманието кон вредносното инвестирање. Според професорот Антонио Идалго, токму подготвеноста на шпанските value инвеститори да ги игнорираат најпопуларните американски технолошки акции ги прави посебни, а успехот на оваа заедница го споредува со земја без фудбалска традиција која, сепак, од година во година произведува играчи од светска класа.