„Нокиа“ се враќа во индексот Euro Stoxx 50, „Фолксваген“ излегува

„Нокиа“ (Nokia Oyj) го враќа своето место на главниот берзански репер во еврозоната, а истовремено „Фолксваген“ (Volkswagen AG) го загуби неговото, што е најнов знак за тешкотиите со кои се соочува автомобилската индустрија во Германија и Европа.

Финскиот производител на опрема за мобилни мрежи ќе биде додаден во Euro Stoxx 50 пред отворањето на пазарот на 21 септември, соопшти составувачот на индекси „Стокс“ (Stoxx Ltd.) во годишниот преглед на индикаторот, со што ќе заврши едногодишниот егзил. Француската електроенергетска  компанија „Енџи“ (Engie SA) исто така ќе влезе, додека холандската компанија за информациски услуги „Волтерс Клувер“ (Wolters Kluwer NV) испаѓа.

Акциите на „Нокиа“ ја зголемија вредноста повеќе од двојно изминатата година, бидејќи инвеститорите ги наградија напорите на компанијата во сферата на вештачката интелигенција и клауд инфраструктурата.

Спротивно на тоа, деградирањето на „Фолксваген“ следи по уште една слаба година за акциите во услови на сè посилна конкуренција од Кина, како и проблеми со намалувањето на трошоците и скапиот премин кон електрични возила. Неговото излегување ги остава „БМВ“ (BMW AG), „Мерцедес“ (Mercedes-Benz Group AG) и луксузниот бренд „Ферари“ (Ferrari NV) како единствени производители на автомобили во Euro Stoxx 50, кој беше лансиран во февруари 1998 година. 

Додавањето на „Енџи“ следи по речиси 40 отсто раст на акциите во текот на изминатата година, додека „Волтерс Клувер“ се лизна заедно со поширокиот пад на акциите што може да бидат изложени на ризик од нарушување од напредокот во вештачката интелигенција. „Енџи“ ја зголеми својата прогноза за профит за целата година на крајот на јули, при што компанијата за електроенергетски услуги се обложува на придобивките од нестабилноста на пазарот поврзана со конфликтот на Блискиот Исток, побарувачката од глобалниот бум на вештачката интелигенција, големата аквизиција во Велика Британија и флуктуациите на валутите.

Составувачот на индекси, исто така, објави промени во поширокиот индекс Stoxx 600 во вторник, вклучувајќи го и додавањето на грчките банки „Пиреус Бенк“ (Piraeus Bank SA) и „Алфа Бенк“ (Alpha Bank SA). Германскиот оператор на аеродроми “Фрапорт“ (Fraport) и британскиот трговски синџир  „ЏД Спортс Фешн“ (JD Sports Fashion Plc) се меѓу оние што ќе испаднат.

Растечката популарност на пасивните фондови значи дека членството во клучните индекси е сè поважно за акциите, со потенцијал да поттикне поголема побарувачка од таканаречените следачи на индекси.

Минатата година во ова време, „Стелантис“ (Stellantis NV), чии брендови се, меѓу другите,  „Фиат“ и „Џип“, испадна од Euro Stoxx 50 по тензичната промена на извршниот директор и американските царини што доведоа до пад на цената на акциите.