По лековите за слабеење, нов хит на берзите се лековите против ќелавост

Фармацевтските компании пронајдоа ветувачко решение за епидемијата на дебелина, а пазарот ги награди со раст на цените на нивните акции. Сега инвеститорите со голем интерес ја следат новата група компании кои се обидуваат да решат проблем кој пред сè има естетска природа: ќелавоста.

Според проценките, наследното опаѓање на косата погодува околу 50 милиони мажи и 30 милиони жени во САД, но ниту еден нов лек не е одобрен од крајот на 1990-тите години. Очекувањата поврзани со новите терапии ги зголемија акциите на „Верадермикс“, која на берзата котира под ознаката „MANE“, за речиси 500 проценти откако компанијата излезе на берза во февруари, додека вредноста на акциите на „Абсци“ од почетокот на 2026 година е повеќе од двојно зголемена.

И компанијата „Космо“ постигна позитивни резултати со експериментален третман против опаѓање на косата кај мажи, иако нејзините акции, кои котираат на берзата во Цирих, се под притисок поради успехот на американските конкуренти.

За оние кои не се кандидати за трансплантација на коса или не можат да си ја дозволат, остануваат две главни опции: миноксидил за локална примена, кој се издава без рецепт и е активна состојка на „Рогаин“, или финастерид, кој се издава на рецепт и се продава под брендот „Пропеција“. И двата лека можат да предизвикаат сериозни несакани ефекти. Миноксидилот се поврзува со забрзано чукање на срцето, а е познато дека финастеридот може да доведе до намалено либидо.

Волстрит во новите третмани гледа неискористена златна жила, односно огромен пазар на потрошувачи подготвени да плаќаат од сопствен џеб за подобри решенија, што потсетува на бумот на GLP-1 лековите за слабеење.

„Луѓето летаат дури и до Турција само за да им пресадат коса од еден дел на главата на друг“, вели Гил Блум, аналитичар во „Нидхам“, кој препорачува купување акции на „Абсци“. „Можете ли да замислите тоа да се постигне без трансплантација на коса?“

Фармацевтските компании и инвеститорите се надеваат дека би можел да се повтори успехот на лековите за слабеење, кои ја зголемија пазарната вредност на „Ели ЛИли“ на повеќе од една милијарда долари, а „Ново Нордикс“ накратко ја направија највредна компанија во Европа.

Bloomberg

Компанијата наведува дека овој третман би можел да биде „најголемата поединечна можност“ во нејзиното портфолио и планира во првиот квартал од 2027 година да поднесе барање до американските регулатори за одобрување на новиот лек. Петпроцентниот раствор на класкотерон за локална примена ја користи истата активна состојка како „Винлеви“, лекот на „Космо“ за лекување акни.

Иако до појавата на новите лекови на американскиот пазар веројатно има повеќе од една година, аналитичарите очекуваат вредноста на акциите на „Космо“ речиси да се удвои во следните 12 месеци.

Аналитичарите на „Џефрис“ проценуваат дека глобалната продажба на терапијата на „Космо“ против опаѓање на косата кај мажите би можела да достигне три милијарди долари, „под претпоставка дека компанијата успешно ќе пронајде соодветен комерцијален партнер“. Во „Џефрис“ сметаат дека партнер би можел да биде пронајден до крајот на годината, што дополнително би можело да го поттикне растот на цената на акцијата.

Како и кај лековите за дебелина, има простор за повеќе успешни играчи на пазарот. Аналитичарите што ги следи „Блумберг“ се едногласно оптимисти кога станува збор за „Космо“ и „Верадермикс“.

„На овој пазар дефинитивно има место за повеќе лекови“, вели Роџер Сонг, аналитичар во „Џеферис“, кој меѓу аналитичарите има највисока целна цена за акцијата на „Верадермикс“. „Многу пациенти што се соочуваат со опаѓање на косата користат повеќе лекови, било на рецепт или без рецепт, сè додека можат да си ги дозволат, бидејќи станува збор за пазар на кој пациентите сами го покриваат трошокот за лекувањето.“

„Верадермикс“ во април објави позитивни резултати за својот водечки кандидат, миноксидил во форма на таблети, наменет за лекување на наследно опаѓање на косата кај мажите. Компанијата во јули извести и за охрабрувачки резултати од средната фаза на клиничките испитувања кај жени со проретчена коса. Доколку добие одобрение од американската Агенција за храна и лекови (FDA), лекот би можел да стане првата одобрена таблета за лекување на наследно опаѓање на косата кај жените.

Во меѓувреме, „Абсци“ го развива ABS-201, лек во рана фаза на развој, дизајниран со помош на вештачка интелигенција и наменет за третман на наследно опаѓање на косата преку инјектирање. Компанијата очекува првични резултати во втората половина од годинава.

„И дебелината и опаѓањето на косата се големи потрошувачки пазари, што е една од причините поради кои и двете категории нудат значителен потенцијал за приходи“, вели Џеф Хсу од „Орбимед“, портфолио-менаџер на фондот „Биотех гроут траст“. „Доколку се пронајде безбеден и ефикасен лек против опаѓање на косата, ќе се отвори огромен потенцијален пазар.“

Секако, развојот на нови лекови е многу ризичен процес. Потенцијалот за високи приноси е проследен и со можност лековите, но и компаниите што ги развиваат, да доживеат неуспех. Пред GLP-1 лековите да ги освојат и осигурителните компании и потрошувачите, цела генерација лекови против дебелина не успеа да оствари продажба што би ги вброила меѓу најуспешните лекови на пазарот, а некои компании дури завршија и во стечај.

Постои и една голема разлика во однос на лековите за слабеење: ќелавоста не е здравствена криза. GLP-1 лековите, како средство во борбата против дебелината, успеаја да обезбедат покривање од здравствените осигурувања, а истовремено да привлечат потрошувачи на кои им е важно исполнувањето на современите стандарди за убавина. Лековите против опаѓање на косата најверојатно и понатаму ќе се плаќаат од сопствен џеб, но многумина во индустријата остануваат оптимисти кога станува збор за нивниот продажен потенцијал.

„Ако можете да му го олесните лекувањето на пациентот така што ќе биде безболно и едноставно како земање таблета, мислам дека тоа отвора сосема нова група потенцијални пациенти“, вели Рајан Ишервуд, кој со сопругата управува со три клиники во американската сојузна држава Висконсин.

И покрај високите пазарни проценки и ризикот од неуспех, аналитичарите сметаат дека и натаму има простор за раст.

„Ова е приказна во која можете да изгубите сè или да постигнете огромен успех. Јас би ја купил акцијата сега бидејќи сè уште е евтина“, вели Блум од „Нидхам“ за компанијата „Абсци“.