Падот на акциите на „Карфур“ за две милијарди евра ја покажува цената на француските немири

Акциите на „Керфур“ (Carrefour SA) се на пат да ја забележат својата најлоша недела од глобалната финансиска криза, откако операторот на супермаркети предупреди дека насилните протести и грабежите низ Франција сериозно ќе влијаат врз прогнозите за работењето во текот на целата година.

Вредноста на акциите падна за 17 проценти во текот на пет дена, со што од пазарната капитализација на компанијата беа избришани повеќе од 2 милијарди евра (2,2 милијарди долари).

Во тоа спаѓа и најголемиот еднодневен пад досега, забележан во средата, откако од „Керфур“ изјавија дека социјалните немири во Франција ја поткопуваат довербата на потрошувачите и ги одвраќаат купувачите од посета на продавниците. Ова би претставувало најголем неделен пад на акциите уште од октомври 2008 година, односно во екот на финансиската криза.

„Керфур“ беше првиот трговец на мало што го обелодени финансиското влијание на немирите, а веројатно е и еден од најтешко погодените, со оглед на тоа што поседува продавници во центрите на градовите и во предградијата, како во Париз, така и во други места. Други француски компании кои известуваа оваа недела наведоа дека е прерано да се процени какво ќе биде влијанието.

Извршниот директор Александар Бомпар им соопшти на аналитичарите дека околу 50 продавници на „Керфур“ биле погодени уште првиот ден од грабежите. Од компанијата изјавија дека очекуваат максимално можно влијание врз профитабилноста во износ од околу 200 милиони евра.

„Намалувањето на прогнозите го сметаме за претпазлив, но соодветен потег“, изјави преку е-пошта Верушка Шети, аналитичар во „Морнингстар“ (Мorningstar Inc).

Други аналитичари изнесоа многу посериозни и позагрижувачки проценки. Франсоа Дигард од „Кеплер“ (Kepler Cheuvreux) изјави дека групацијата „остава впечаток како да влегува во ‚долината на сенката на смртта‘“, при што ја промени својата препорака за акциите од „купувај“ во „задржи“.

„За жал, кој би сакал да инвестира во Франција под вакви околности?“, напиша тој во својот аналитички извештај.

Дигард не беше единствениот што зазеде понегативен став кон акциите. „Морган Стенли“ (Morgan Stanley), „ЦИЦ Маркет Солушнс“ (CIC Market Solutions) и „УБС Груп“ (UBS Group AG) исто така ги намалија своите рејтинзи. Според податоците собрани од „Блумберг “, „Керфур“ сега има пет препораки за „купувај“, 11 за „задржи“ и две за „продај“. Аналитичарите, исто така, ги намалија и своите прогнози за заработката на компанијата.

Предупредувањето од „Керфур“ го засени она што дотогаш беше добра година за акциите на компанијата. До крајот на минатата недела, вредноста на акциите во 2026 година порасна за 17 проценти, што ја ставаше компанијата на пат кон најдобрата година уште од 2013 година.

— Со придонес на Мајкл Мсика