Американските акции во црвено, европските и азиските во плус

Жилавиот американски пазар на трудот сè уште не покажува знаци на забавување, што значи дека ФЕД ќе мора да продолжи да ги зголемува каматните стапки, а сето тоа има негативно влијание врз пазарите на капитал. Затоа, цените на акциите на Волстрит во вторникот потонаа втор ден по ред.

Dow Jones загуби 0,24 отсто, на 32.653 поени, додека S&P 500 падна за 0,41 отсто, на 3.856 поени, а индексот Nasdaq падна за 0,89 отсто, на 10.890 поени.

Седницата на ФЕД завршува денеска и се очекува уште едно, четврто по ред, зголемување на каматните стапки за 0,75 процентни поени.

За разлика од американските, европските акции се во плус. Во вторникот лондонскиот индекс FTSE зајакна за 1,29 отсто, на 7.186 поени, франкфуртскиот DAX порасна за 0,64 отсто, на 13.338 поени, а парискиот CAC за 0,98 отсто, на 6.328 поени.

Тренд на раст се забележува и на азиските берзи. Индексот MSCI на азиско-пацифичките акции, без јапонските акции, порасна за 0,8 отсто околу 19 часот. Само индексот Nikkei падна за 0,1 отсто, додека цените на акциите во Јужна Кореја, Австралија, Шангај и Хонгконг пораснаа меѓу 0,1 и 2,4 отсто. Најголем раст забележаа акциите на берзите во Шангај и во Хонгконг, над 1,5 отсто.

И доларот ослабе

Во исчекување на одлуката на ФЕД, индексот на доларот, кој ја покажува вредноста на американскиот долар во однос на другите шест главни светски валути, се лизна за 0,14 отсто, на 111,33 поени. Американската валута ослабе во однос на еврото за 0,15 отсто, па цената на еврото достигна 0,9890 долари.

Цените на нафтата, од друга страна, пораснаа по извештаите за неочекуван пад на резервите на сурова нафта во САД. Цената на барел на лондонскиот пазар се зголеми за 1,20 отсто, на 95,80 долари, додека на американскиот пазар барелот поскапе за 1,40 отсто, на 89,65 долари.