Волстрит во минус четврти ден по ред

На Волстрит негативниот тренд продолжи четврти ден по ред, бидејќи пазарите шпекулираат дека ФЕД може да ги зголемува каматните стапки повеќе од првично очекуваното.

Така, во четвртокот Dow Jones ослабе за 0,46 отсто, на 32.001 поен, додека S&P 500 се лизна за 1,06 отсто, на 3.719 поени, а Nasdaq за 1,73 отсто, на 10.342 поени.

Американскиот пазар на труд се покажа исклучително отпорен на сите негативни околности, принудувајќи го ФЕД дополнително да ја заостри монетарната политика за да предизвика заладување. Се проценува дека клучните каматни стапки би можеле да достигнат најмалку 5 отсто, додека досега се очекуваше да бидат меѓу 4,50 и 4,75 отсто на врвот на циклусот.

Негативните трендови во Америка ги следат и европските берзи, со исклучок на лондонскиот FTSE, кој зајакна 0,62 отсто, на 7.188 поени. Од друга страна, франкфуртскиот DAX се слизна за 0,95 отсто, на 13.130 поени, а парискиот CAC за 0,54 отсто, на 6.243 поени.

Азиските берзи, пак, се во зелено. Индексот MSCI на азиско-пацифичките акции, без јапонските, порасна за 2,7 отсто околу 19 часот. Притоа, цените на акциите во Јужна Кореја, Австралија, Шангај и Хонгконг пораснаа меѓу 0,5 и 6,7 отсто, додека јапонскиот индекс Nikkei падна за 1,8 отсто.

И доларот зајакна втор ден по ред. Индексот на доларот кој ја покажува вредноста на американскиот долар во однос на другите шест најважни светски валути се движи околу 112,70 поени, додека вчера во ова време изнесуваше 111,88 поени.

Што се однесува до нафтата, цената на барелот на лондонскиот пазар се зголеми за 1,48 отсто, на 96,05 долари, додека на американскиот пазар барелот поскапе за 1,70 отсто, на 89,65 долари.