Азиските берзански индекси се на чекор до неделна добивка

Азиските акции напредуваа, а растот го предводеа технолошките во Хонгконг, бидејќи инвеститорите станаа оптимистични во врска со натамошното ублажување на кинеските ограничувања предизвикани од ковид.

Индексот на кинеските технолошки акции скокна дури за 4,4 проценти, додека индексот MSCI Asia Pacific е на прагот да оствари трет неделен раст по ред. Стратезите од Голдман сакс дополнително ги поттикнаа акциите во Хонгконг со тоа што се обложуваа за повторно отворање на кинеската економија.

 

 

И Кина го намали износот на своите краткорочни парични инјекции во банкарскиот систем, бидејќи пазарот на државни обврзници се стабилизира по овонеделните големи загуби.

Акциите пораснаа во Јапонија и во Австралија, како и во Јужна Кореја, што укажува на слаба реакција на веста дека Северна Кореја лансирала проектил.

Приносите од државните обврзници беа стабилни по скокот од претходниот ден, кога претседателот на ФЕД Сент Луис, Џејмс Балард, рече дека креаторите на политиките би требало да ги зголемат каматните стапки на најмалку пет до 5,25 отсто за да ја ублажат инфлацијата. Тој, исто така, предупреди и на натамошниот финансиски стрес што следува.

Доларот падна по вчерашното заздравување.

Со оглед на тоа дека инфлацијата штотуку почна да попушта, а податоците за малопродажбата во САД растат со најбрзо темпо во последните осум месеци, надлежните од ФЕД последниве денови нагласуваа дека мора да се продолжи со политиките за да се намалат ценовните притисоци. Коментарите на Балард дојдоа ден откако претседателката на ФЕД Сан Франциско, Мери Дели, изјави дека не е на маса опцијата за пауза во зголемувањето на каматните стапки. Нивниот остар тон вчера го повтори и претседателот на ФЕД Минеаполис, Нил Кашкари.

Bloomberg Mercury

 

„Пазарот верува дека инфлацијата е во надолен тренд. И ние исто веруваме во тоа, но фактот дека инфлацијата го достигна врвот не е причина за ФЕД да се преориентира кон намалување на каматните стапки“, рече за Блумберг радио, Пол Кристофер, раководител за глобални пазарни стратегии на инвестицискиот институт „Велс Фарго“ (Wells Fargo Investment Institute).

Вчерашните податоци што покажуваат дека неделните барања за невработеност биле под предвидувањата дополнително ја нагласија силата на пазарот на трудот. Американските хипотекарни стапки, кои се доближија до најголемиот неделен пад од 1981 година, накратко го поправија расположението, иако главниот економист Фреди Мек рече дека патот пред пазарот на недвижности е многу долг.

Во Јапонија инфлацијата во октомври достигна највисока стапка во последните 40 години. Таквиот резултат ја става јапонската централна банка во уште понепријатна позиција додека се обидува да ја објасни потребата да се држи монетарен стимул за да се продолжи со стабилен раст на цените.

Златото порасна откако доларот падна. Биткоинот е на пат да оствари неделна добивка иако колапсот на ФТХ продолжи да го вознемирува криптопазарот.

Во моментов нема коментари за веста. Биди прв да коментира...

Остави коментар