Акциите растат трет ден по ред, додека доларот паѓа

Европските акции зајакнаа, а доларот падна откако записникот од состанокот на банкарите од американските Федерални резерви (ФЕД) покажа поддршка за умерено зголемување на каматните стапки.

Индексот Stoxx Europe 600 продолжи со својот раст, бидејќи секторот на недвижности беше подобар, поттикнат од можноста за побавно зголемување на каматите и подобрените прогнози на аналитичарите. Акциите на „Др. Мартенс“ (Dr. Martens Plc) паднаа најмногу во историјата, откако продажбата и заработката на производителот на чизми не ги достигнаа очекувањата. Индексот на светските акции напредуваше трет ден по ред.

Индексот S&P 500 порасна за 0,3 проценти, искачувајќи се веќе трет ден по ред, најдолга низа на добивка од 8 ноември. Иста е статистичката ситуација и со индексот Dow Jones Industrial Average, кој вчера порасна за 0,2 отсто, искачувајќи се и тој веќе трет ден по ред. Светскиот индекс MSCI World порасна за 0,4 проценти. Азиската референтна вредност на акциите порасна.

Обемот на тргување е помал поради празникот Ден на благодарноста, без готовинско тргување на американските пазари на акции.

Bloomberg Mercury

 

Записникот од состанокот на ФЕД овој месец покажа дека неколкумина од банкарите ја поддржаа потребата за умерено темпо на покачување на стапките, иако некои од нив нагласуваа аргументи за поголема терминална стапка. Тоа им дава дополнителна тежина на очекувањата дека централната банка следниот месец ги подигнува каматите за 50 базични бода, прекинувајќи ја низата од големи покачувања од 75 базични бода.

Податоците од средата покажаа и дека деловната активност во САД се намалила, а бројот на пријави за невработени пораснал, што укажува на тоа дека економијата се лади.

Мерачот на силата на доларот вчера дополнително падна, веќе трет ден по ред. Европските обврзници зајакнаа, додека со американските нема тргувања поради празникот во САД.

Во меѓувреме, Банк од Америка (Bank of America Corp.) соопшти дека нејзините приватни клиенти се впуштаат во тргување со обврзници и остануваат без акции поради стравот од рецесија. Обврзничките фондови привлекуваат пријави 39-та недела по ред, пишуваат во извештајот стратезите предводени од Мајкл Хартнет (Michael Hartnett). Стратезите преферираат држење на обврзниците во првата половина од 2023 година, а акциите ќе станат поатрактивни во последните шест месеци од следната година.

Златото порасна трет ден по ред врз основа на активностите од ФЕД. Благородниот метал е оштетен од агресивната монетарна политика на заострување на централната банка на САД, чија цел е да ја заузди инфлацијата, која ги подигна приносите на обврзниците и доларот, а за возврат златото го испрати во пад од околу 16 проценти во однос на врвот достигнат во март.

Во азиското тргување акциите во континентална Кина имаа послаби резултати, бидејќи инвеститорите се внимателни поради влијанието од рекордните случаи на ковид во однос на олабавувањето на монетарните услови. Официјалните коментари покажуваат дека Народната банка на Кина ќе им допушти на банките намалување на резервите на капитал, за да поттикнат раст.

Во моментов нема коментари за веста. Биди прв да коментира...

Остави коментар