Даночењето на капиталната добивка ќе има негативно влијание на берзата

Не е добро време за воведување данок на капиталната добивка и ќе има негативни импликации, сметаат од Македонската берза. За „Блумберг Адрија“ велат дека и претходно и сега нивниот став по ова прашање е јасен.

“Тајмингот да се отпочне со оданочување на капиталните добивки од тргувањето со хартии од вредност на домашниот пазар е неповолен. Оваа година состојбите се влошени и како промет и како ценовни движења на берзата. Физичките лица креираат околу 60 отсто од куповниот промет и оданочувањето на капиталните добивки ќе предизвика одредени негативни импликации на страната на побарувачката“, велат од Берзата.

При презентацијата на даночната реформа минатата недела, министерот за финансии рече дека од 01 јануари 2023 година ќе се плаќа данок на капитална добибвка.

„Одредбата што се однесува на оданочување на капиталните добивки остварени од продажба на хартии од вредност и удели издадени од инвестициски фонд стекнати од 1 јануари 2023 година, а кои ќе се отуѓат во рок од две години од стекнувањето, останува и предвидено е годишно пресметување и плаќање на данокот, врз основа на решение од УЈП подготвено врз основа на извештај од Централниот депозитар за хартии од вредност, односно од друштвата за управување со инвестициски фондови“, вели министерот.

За разлика од капиталните добивки, каматите од депозитите нема да се даночат се додека земјава не влезе во Европската унија, објасни министерот, иако и за нив претходно беше најавено дека ќе бидат оданочувани од 01 јануари догодина.

Според Македонска берза, овој сегмент од даночната рефрма е дискриминирачки.  

„Со овој потег, инвестирањето на берза повторно добива понеповолен даночен третман во однос на вложувањето во банкарски депозити“, велат оттаму.

При конципирањето на решението за данокот на капитална добивка, според власта применото е хрватското искуство за даночење на годишно ниво, наместо по трансакција како што беше планирано.

Од Македонска берза велат дека имале соработка со законодавецот во овој дел.

„Од друга страна, мора да истакнеме дека во јавната расправа надлежните институции беа максимално отворени за предлозите на пазарните институции и учесници и дека, согласно најавите, во новата даночна регулатива ќе се воведат определени решенија што се добри солуции во поглед на фреквенцијата и начинот на пријавување на овој данок, дистинкцијата помеѓу краткорочни и долгорочни капитални добивки и опфатот и динамиката на примена.”

Капиталната добивка се даночи според Законот за данок на личен доход со стапка од 10 отсто, исто колку и во Хрватска. Оваа стапка е меѓунајниските во регионот. Во Србија, Босна и Херцеговина и Црна Гора таа изнесува 15 отсто. Просекот во европските земји изнесува 19, 3 отсто.

Bloomberg Tax