Берзите се на пат да ја прекинат тринеделната низа загуби

Мерачот на глобалните акции е подготвен да стави крај на серијата на трикратни неделни загуби, бидејќи инвеститорите го одмеруваа негативното влијание на повисоките каматни стапки наспроти позитивните знаци за раст од кинеската економија.

Азиските акции се водени нагоре најмногу од добивките во Хонгконг и Токио утрово, надградувајќи го напредокот во САД во четвртокот, кога индексот S&P 500 скокна најмногу за повеќе од две недели.

 

 

Позитивното чувство на пазарот на акции беше поддржано и од коментарите на претседателот на Банката на федерални резерви (ФЕД) на Атланта, Рафаел Бостиќ, дека централната банка би можела да биде во позиција да го паузира зголемувањето на каматните стапки некаде ова лето. Инвеститорите на пазарите на стапки продолжија да се фокусираат на ризиците од инфлација и на сите забелешки и од другите претставници на ФЕД.

Приносите на државните обврзници во Азија утрово се стабилни, откако се поместуваа повисоко во американската сесија на тргување, кога 30-годишната стапка ја проби границата од четири проценти, а двегодишната стапка, која е најчувствителна на промените на монетарната политика, беше за околу 10 базични поени под нивото од пет отсто.

Вредноста на доларот малку се лизна утрово, откако вчера се зголеми во однос на повеќето валути од групата 10. Падот дојде бидејќи податоците за фабричките нарачки во Кина, кои беа посилни од очекуваното, ја зајакнаа побарувачката на инвеститорите за ризични средства.

По затворањето на американскиот пазар, гувернерот на ФЕД, Кристофер Валер, рече дека би сакал да ги зголеми каматните стапки уште повеќе од неговата сегашна перспектива ако економските показатели продолжат да бидат над очекувањата. Фокусот сега е на тоа колку повисоко би можеле да одат каматни стапки во САД и Европа, при што сега процените се дека највисоката каматна стапка на ФЕД ќе достигне 5,5 проценти во септември, а некои трговци дури се обложуваат на шест отсто.

„Сметаме дека ФЕД приближно ќе заврши помеѓу 5,25 и 5,75 проценти. Мислам дека тоа е доволно рестриктивно. Но мислам дека има група инвеститори што сметаат дека ФЕД можеби ќе треба да ги зголеми каматите многу повеќе“, рече Прија Мисра, глобален раководител за стратегија за каматни стапки во „ТД секјуритис“ (TD Securities), во изјава за телевизијата Блумберг.

На другите пазари златото се искачи за 0,2 проценти и утрово унца чини 1.838,63 долари.

На криптопазарот, пак, сликата е сосема обратна. Најголемиот токен, биткоинот, падна за 4,6 проценти и сега чини 22.330,36 долари, додека етерот загуби 4,8 проценти од својата вредност и утрово се тргува по цена од 1.562,37 долари.