Берзите во зелено, избледе загриженоста за финансиските системи

Утрово завладеа мал позитивен тон за преземање ризик, кога станува збор за фјучерсите на европските акции и азиските пазари на капитал, бидејќи избледе моменталната загриженост околу силата на глобалниот финансиски систем. Во денешното тргување фјучерсите за Euro Stoxx 50 се зголемија за 0,6 проценти. 

 

 

Фјучерсите за S&P 500 денеска се само малку повисоки по вчерашниот скок од 0,9 проценти. Технолошкиот индекс Nasdaq 100 порасна за 0,3 проценти, додека азиските индекси се во позитивната зона со раст меѓу 0,4 и 0,9 проценти.

Веста дека американските власти проучувале начини за привремено да ги гарантираат сите банкарски депозити доколку се прошири тековната финансиска криза, ги испрати вчера договорите за S&P 500 и Nasdaq 100 до нивните највисоки нивоа во текот на денот.

Вредноста на доларот се искачи повисоко и стави крај на тридневната серија на загуби, што доведе до тоа показателот за јачината на зелената валута да се спушти на најниско месечно ниво. Тоа се случи откако се зголемија очекувањата дека Федералните резерви (ФЕД) може да се приспособат и да бидат повнимателни во политичкиот пристап кога утре ќе одлучуваат за каматните стапки. Инаку, еврото малку ја зголеми својата вредност во однос на доларот и овие валути сега се тргуваат по курс од 1,0713 долари за евро.

 

 

Приносот од двегодишните обврзници на американското министерство за финансии, кој е чувствителен на монетарната политика, вчера заврши за 14 базични поени повисоко, односно нешто под четири проценти. Инвеститорите внимателно ќе го следат состанокот на ФЕД, а ги зголемија облозите за зголемување на каматите од четвртина поен, бидејќи неодамнешните финансиски превирања поттикнаа шпекулации за побавно темпо на монетарно затегнување од страна на големите централни банки низ светот.

„Се сомневаме дека ФЕД сака да испрати премногу претпазлив сигнал на пазарите, бидејќи сега е клучно да се врати довербата на пазарот“, напишаа Френсис Чеунг и Кристофер Вонг, стратези во сингапурската „Оверси-чајнис бенкинг“ (Oversea-Chinese Banking Corp).

Пред само неколку недели инвеститорите се обложуваа дека ФЕД ќе ги зголеми стапките до близу 6 отсто и дека Европската централна банка (ЕЦБ) ќе ги покачи над границата од четири проценти. Сега пазарите сугерираат дека циклусите на затегнување се речиси завршени и се обложуваат на повеќекратно намалување на стапките во САД до крајот на годината. Трговците моментално гледаат дека референтната стапка на ФЕД ќе ја заврши годината на ниво од околу четири проценти, што е цел процентен поен помалку од процената за каматната стапка на централната банка во декемврискиот извештај, кој е дел од кварталните економски проекции.

„Според нашето мислење, понатамошни зголемувања на стапките повеќе не се гарантирани. Претседателот на ФЕД, Џером Пауел, ќе мора да признае дека кризата потврдува дека каматните стапки се доволно рестриктивни и дека финансиските услови брзо се заоструваат“, напиша во белешка Ед Јардени, претседател на „Јардени рисрч“ (Yardeni Research Inc).

 

 

На другите пазари, златото вчера во еден момент од тргувањето за првпат по една година го надмина прагот од 2.000 долари за унца, а потоа до крајот на тргувањето повторно се спушти под таа психолошка граница. Утрово златните прачки се тргуваат со 0,1 отсто повисока цена од вчерашното затворање, односно унца чини 1.981,54 долари.

 

 

На криптопазарот сликата е негативна. Биткоинот го започна денов со пад од 0,6 проценти, на 27.900,75 долари, а етерот загуби 0,9 отсто од својата вредност и се тргува за 1.745,88 долари.