Акции или ЕТФ - што да одберете оваа есен

Дури 16 квартали по ред „Енвидија“ објавува финансиски резултати кои ги надминуваат очекувањата на Волстрит. Производителот на чипови што се наоѓа во срцето на бумот на вештачката интелигенција, објавувајќи ги резултатите на вториот квартал, соопшти дека приходите ќе пораснат за околу 70 отсто во следната фискална година, прогнозите на аналитичарите одеа до 45 отсто.  

Оваа објава ја ублажи загриженоста на инвеститорите дека трошењето за вештачка интелигенција би можело да го загуби својот замав. Дополнително, оптимистичките прогнози донесоа и олеснување за сите оние кои беа загрижени дека вештачката интелигенција е балон кој може во секое време да пукне.

Резултатите на „Енвидија“ се само уште еден сигнал дека вештачката интелигенција ќе остане главната структурна приказна до крајот на оваа година, вели во разговор за „Блумберг Адрија“ Коста Костадиновски, директор на „Капитал Асет менаџмент“. Сепак, тој очекува ВИ бумот да се рефлектира и на други сектори -како градежништво, финансии - кои се поддршка на ВИ циклусот.

„Мислам дека следната фаза ќе биде интересна токму поради проширувањето на ВИ тргувањата. Ако досега инвеститорите купуваа компании кои произведуваат чипови и клауд инфраструктура, следниот бран треба да биде кај компаниите кои обезбедуваат нешто без кое ВИ не може да функционира: електрична енергија, мрежа, дата-центри, индустриска опрема и инфраструктура“, вели Костадиновски.

Во што да вложувате до крајот на годината?

И сега се поставува прашањето е што да се одбере – акции на конкретни компании кои, како „Енвидија“ континуирано објавуваат резултати подобри од очекувањата или да се диверзифицира портфолиото и да се вложи во ЕТФ.

„Јас не би го поставил инвестирањето како дилема ‘акции или ETФ’. Акции се разбира! Суштината на доброто инвестирање е многу поедноставна, но и многу потешка за практикување: да идентификувате квалитетна компанија, детално да ја следите, да разберете како создава вредност, какви се нејзините финансиски резултати и перспективи и потоа да ја купите по цена која ви остава доволно простор за принос. Добрата компанија не е нужно добра инвестиција по секоја цена. И обратно, одлична компанија може да биде исклучително атрактивна инвестиција доколку во одреден момент пазарот и даде разумна или потценета вредност. Затоа, јас многу повеќе би се фокусирал на квалитетот на бизнисот и цената што ја плаќаме, отколку на тоа кој сектор моментално е во фокусот на јавноста“, вели Костадиновски.

Коста Костадиновски, Капитал асет менаџмент

Според него, тоа значи следење на работи како приходите и профитот, паричните текови, задолженоста, конкурентските предности, приносот на капиталот, менаџментот и слично.

„Денешниот пазар бара уште поголема селективност и внимателност, бидејќи постои концентрација на компании со високи проценки на вредност и нема простор за грешка“, вели тој.

Ова не е само обично „тек рели“

Го прашавме Костадиновски дали вештачката интелигенција е причината што оваа година пазарите не ги доживеаја таканаречените „кучешки летни денови“ (од англиски: dog days of summer), како што се нарекува августовскиот период за кој е вообичаена намалената пазарна активност.

„ВИ е највидливиот дел од приказната, но зад растот стојат неколку многу важни фактори. Прво, корпоративните резултати се значително подобри од очекувањата. Во САД растот на профитите е широк, а не е ограничен само на неколку технолошки компании. Тоа е многу важно, бидејќи пазарниот раст е многу поздрав кога го следи растот на добивките. Во вториот квартал, растот на профитите на S&P 500 е особено силен, со технологијата повторно како лидер“, вели тој.

Понатаму, според него, инвестициониот циклус поврзан со вештачката интелигенција е многу поголем од обично „тек рели“ затоа што кога технолошките гиганти инвестираат стотици милијарди долари во дата-центри, чипови и инфраструктура.

„Тоа создава побарувачка и за електрична енергија, мрежи, опрема, градежништво, индустриски компании и финансиски услуги. Тоа е причината зошто денес јас би зборувал за ‘ВИ инфраструктурен циклус’, а не само за ВИ акции“, објаснува Костадиновски.

Промена на европските берзи

Според „Блумберг“, активноста на европските пазари ова лето е сигнал дека закрепнувањето ќе биде потрајно од само уште една краткорочна трговија. Сите пазарни показатели покажуваат дека во тек е голема промена кај европските акции

„Постои дефинитивно возбуда за Европа“, рече Хелен Џуел, меѓународна главна инвестициска директорка за фундаментални акции во „Блекрок“ (BlackRock Inc). „Отпорноста на регионот го изненади пазарот и побарувачката останува многу поцврста отколку што се очекуваше.“

Според Костадиновски, европскиот пазар има своја приказна затоа што Европа не е директен победник на ВИ бумот како САД, но има многу поголема изложеност кон банки, индустрија, енергија, инфраструктура и одбрана.

„Во исто време, европските акции сè уште се поатрактивно вреднувани во споредба со американските. Ова објаснува зошто европските индекси можат да растат и без европската економија да расте со американската динамика. Последно, но не и најмалку важно, пазарот почна да го дисконтира можниот полабав монетарен циклус. Кога инфлацијата постепено се смирува, а економијата останува релативно отпорна, добивате комбинација која е многу поволна за акциите: добивките растат, а притисокот од каматните стапки се намалува“, вели тој.

И оттука, според него, и финансискиот сектор е интересен затоа што банките имаат сосема поинаква динамика на добивките од технолошкиот сектор.

„Во Европа веќе гледаме дека банките се меѓу најсилните делови од пазарот. Повисоките каматни стапки, подобрената профитабилност и релативно атрактивните проценки на вредноста создаваат простор за понатамошен раст“, вели Костадиновски.

Во Европа движечка сила ќе бидат и одбраната и инфраструктурата „бидејќи геополитичката реалност ја претвори одбраната од политичка тема во повеќегодишен инвестициски циклус. Тоа е нешто што пред неколку години беше тешко да се замисли во денешниве размери“, вели тој.