Берзанските индекси растат пред одлуката на ФЕД за каматите

Во пресрет на состанокот на банкарите од американските Федерални резерви (ФЕД), кои треба да одлучат за тоа дали и колку ќе се зголемат каматите, расположението на светските берзи е позитивно.

 

 

Индексот S&P 500 порасна за 1,3 отсто, а индустрискиот индекс Nasdaq 100 се зголеми за 1,4 отсто. Европскиот Euro Stoxx 50 се искачи нагоре за 0,3 проценти. Позитивата е присутна и кај азиските берзански индекси, каде што јапонскиот и хонгконшкиот се со најголем раст од 1,8 отсто, а кинескиот бележи најмал раст од 0,2 отсто, бидејќи загриженоста за глобалната финансиска стабилност се намали.

Падот на американските приноси од државни обврзници дојде по вчерашниот пораст, кога се зголемија за 19 базични поени кај двегодишниот принос и 12 базични поени кај десетгодишниот репер.

 

 

Индексот на „Блумберг“ за вредноста на доларот беше малку променет. Еврото сосема малку се промени во однос на доларот и сега овие валути се разменуваат по курс од 1,0771 долар за едно евро. Мешавината на растот на цените на акциите и општо смирениот пазар на државни благајнички записи укажаа на свеж апетит за преземање ризик, бидејќи инвеститорите гледаат знаци на стабилност по колапсот на три американски банки и преземањето на „Кредит Суис“ (Credit Suisse Group AG) од страна на УБС (UBS Group AG).

Трговците даваат поголеми шанси дека ФЕД ќе ги зголеми каматните стапки за 25 базични поени откако претходно, на почетокот на неделава, беа поделени помеѓу зголемување и паузирање на покачувањето на каматите.

„Откако ќе погледнеме подалеку од сегашната нестабилност, сè уште е оправдано рестриктивната политика да остане малку подолго“, рече Јутинг Шао, стратег за макроекономија во „Стејт стрит глобал маркетс“ (State Street Global Markets), во интервју за радиото „Блумберг“.

Акциите на банката „Фрст рипаблик“ (First Republic Bank) паднаа за околу девет проценти, откако претходно се зголемија речиси за 30 отсто во својот најдобар ден на тргување досега. Добивката дојде во услови на оптимизам за новиот план што се дискутира за помош на регионалниот заемодавец. Понатамошната интервенција за зајакнување на банката може да вклучи поддршка од американската влада, велат лица запознаени со ситуацијата.

Сепак, многумина гледаат повеќе проблеми пред нив. Мајкл Вилсон, главен американски стратег за акции на „Морган Стенли“, рече дека ризикот од кредитна криза значајно се зголемува.

 

На другите пазари, денешната промена на вредноста на златото е незначителна.

 

 

На криптопазарот сликата е обратна од вчерашната. Најголемиот токен, биткоинот, утрово порасна за 0,6 проценти, искачувајќи се на 28.332,08 долари, а етерот ја зголеми својата вредност за 0,4 отсто, на 1.808,95 долари.