Зеленило на берзите, глобалните акции се пред втора квартална добивка

Мерачот на глобалните акции се упатува кон втора квартална добивка по ред, нагласувајќи го оптимизмот на инвеститорите во услови на банкарски превирања и покачени каматни стапки. Технолошките акции го предводат тој раст во ова тримесечје, зголемувајќи се за 19 проценти, најмногу од средината на 2020 година.

 

 

Утрово индексот S&P 500 порасна за 0,6 отсто, а технолошкиот Nasdaq 100 за 0,9 отсто. Фјучерсите за европските акции пораснаа за 0,2 отсто, а позитивна е состојбата и со азиските акции. Таму индексите денеска остваруваат добивка во висина меѓу 0,2 отсто на пример во Кина и 1,4 отсто во Јапонија.

Европската валута, која се доближува кон својот двомесечен максимум во однос на американскиот долар, утрово е малку променета и нивниот курс за размена е 1,0906 долар.

Обврзниците беа стабилни во азиското тргување по бурниот период. Имаше диви промени во приносите оваа година бидејќи инвеститорите се мачеа да се приспособат на банкарските колапси и променливите изгледи за каматните стапки во услови на висока инфлација и закани за економскиот раст. Приносот од двегодишните обврзници утрово изнесува околу 4,11 отсто, додека кај тие со рочност од 10 години е околу 3,56 проценти.

Вчерашните добивки на американските берзи дојдоа во момент кога набљудувачите на пазарот веќе ги анализираа коментарите на ФЕД, со кои се сугерира дека е неопходно дополнително монетарно затегнување, дури и по колапсот на трите американски банки во текот на овој месец. Претседателката на ФЕД Бостон, Сузан Колинс, рече дека е потребно затегнување, додека претседателот на ФЕД Ричмонд, Томас Баркин, рече дека ФЕД може да ги зголеми стапките повеќе ако продолжат ризиците од инфлација.

Движење на индексот S&P 500 / Bloomberg Mercury

 

Позитивните сигнали од Кина му помогнаа на индексот на стоки на „Блумберг“ да ја намали својата квартална загуба, при што нафтата врати половина од загубите од почетокот на март.

Официјалниот показател за обемот на производство, објавен денеска, покажа дека Кина успеала да го задржи моментот во своето економско закрепнување во март. Повеќето аналитичари на пазарот сè уште се обложуваат дека закрепнувањето на Кина ќе го поткрепи растот на цените подоцна оваа година. Тој оптимизам е очигледен и во плановите за продажба на кинеските акции.

Трговците и натаму се внимателни во услови на можен ребаланс на крајот на кварталот и продолжуваат да дебатираат до кој степен креаторите на политиката може да ги намалат каматните стапки оваа година.

„Сега мора да претпоставите дека играта е променета и дека банкарите од ФЕД ќе бидат поумерени. Денес сме на нивоа што се многу рестриктивни“, рече Рик Ридер, главен инвестициски директор за глобален фиксен приход во „Блекрок“ (BlackRock Inc), во изјава за телевизијата „Блумберг“.

Сепак, неколку стратези рекоа дека се погрешни пазарните очекувања за намалувања на стапките од страна на ФЕД оваа година, бидејќи пазарот на трудот останува отпорен, иако барањата за невработеност во САД се зголемија за првпат во последните три недели.

Златото утрово е сосема малку променето, но е на пат кон најголем месечен пораст од јули 2020 година.

На криптопазарот нема големи промени. Биткоинот се тргува по цена од 28.170,82 долари, додека етерот порасна за 0,4 отсто и чини 1.802,9 долари.

Во моментов нема коментари за веста. Биди прв да коментира...

Остави коментар