Дел од берзанските индекси растат поради намалената инфлација во САД

Фјучерсите на американските акции се зголемија, а кинеските акции утрово се движат помеѓу мали добивки и загуби бидејќи знаците за забавување на инфлацијата во двете најголеми светски економии поттикнаа надежи за монетарно олеснување.

 

 

Договорите за индексот S&P 500 пораснаа за 0,4 проценти, а за технолошкиот Nasdaq 100 дури за 1,1 отсто. Европскиот индекс Euro Stoxx 50 порасна за 0,2 процента. Во Азија берзанските индекси имаат мал пад, во распон од 0,1 до 0,3 проценти.

Во Кина, инфлацијата во април забави повеќе од очекуваното, додека растот на фабричките цени исто така беше помал од прогнозите, одржувајќи го прозорецот за монетарно олеснување од страна на Народната банка на Кина.

Американскиот долар ги одржува загубите во однос на другите валути, па, споредено со еврото, утрово се тргува по цена од 1,0980 долар за евро.

Инфлацијата во САД покажа знаци на ублажување во април, давајќи им простор на Федералните резерви (ФЕД) да ја паузираат својата агресивна кампања за затегнување на монетарната политика. Минатиот месец цените на американскиот пазар пораснале за 4,9 проценти, што е прво читање под пет отсто во последните две години. Базичната инфлација се задржа на 5,5 проценти.

На пазарите на суровини, златото порасна како резултат на знаците дека американската инфлација се лади. Според тоа, златните прачки ја зголемија својата вредност за 0,2 отсто и унца сега чини 2.033,26 долари.

Спротивно на претходното, на криптопазарот сликата е негативна. Најголемиот токен, биткоинот, падна за 1,6 отсто, на 27.429,64 долари, а етерот загуби 1,7 отсто од вредноста, па се тргува за 1.826,78 долари.

Во моментов нема коментари за веста. Биди прв да коментира...

Остави коментар