text size
Џеф Безос, третиот најбогат човек на светот, пред две недели направи нешто чудно: купи една единствена акција од „Амазон“ (Amazon.com Inc) за 114,77 долари. Тоа е негово прво купување акции во евиденцијата од 2002 година.
Основачот на „Амазон“ е попознат по продажбата. Имено, тој издаде акции вредни околу 30 милијарди долари од 2002 година наваму за да ги финансира неговите различни активности, почнувајќи од ракетната компанија „Блу ориџин“ (Blue Origin), па се' до лични задоволства како неговата нова суперјахта „Кору“, вредна 500 милиони долари.
По првичната јавна понуда на „Амазон“ во 1997 година, Безос не доби дополнителни акции како компензација и зема само мала плата. Тој сè уште поседува околу 10 проценти од компанијата, што претставува најголемиот дел од неговото богатство од 148 милијарди долари, според индексот на милијардери на „Блумберг“.
Набавката на акцијата од 25 мај го направи побогат за околу 10 долари бидејќи акциите на „Амазон“ денеска се тргуваа по цена од околу 124 долари, поттикнати од поширокиот технолошки раст.
Потегот на Безос ги збуни аналитичарите на „Амазон“, но и набљудувачите на акции кои не знаат што да направат и како да го толкуваат тоа единствено купување. Социјалните мрежи беа преполни со теории, при што едно лице шпекулираше дека Безос планира да го даде физичкиот сертификат како подарок, а други се потсмеваа дека сигурно случајно кликнал на копчето за купување на неговата брокерска сметка. „Амазон“ и претставник на Безос одбија да коментираат за купувањето.
„Му требаше уште една акција за да ја врати контролата“, се пошегува Марк Шмулик, аналитичар од „Сенфорд Бернштејн“ (Sanford C. Bernsteina). Инаку, Безос поседува 9,7 проценти од акциите на „Амазон“ и ја задржува контролата на гласањето над 2,9 отсто од акциите во сопственост на Мекензи Скот, неговата поранешна сопруга, покажуваат податоците собрани од „Блумберг“. Сепак, сериозниот одговор на Шмулик, како и на сите други е дека се обидуваат да откријат за што се работи.
Купувањето на Безос беше пријавено следниот ден во 16:20 часот по њујоршко време. А, истовремено тој подарил 69.290 акции во вкупна вредност од речиси осум милиони долари на непрофитна организација, покажува поднесениот извештај.
.webp){kind=icon}
