Волстрит свена откако ФЕД најави натамошно затегнување

Иако Федералните резерви (ФЕД) најавија дека нема да ги зголемат референтните каматни стапки во јуни, расположението на инвеститорите на Волстрит стивна. Пораките од претставниците на ФЕД дека каматните стапки ќе бидат и натаму зголемувани во наредниот период дејствуваа демотивирачки.

Dow Jones Industrial Average се лизна за 0,68 отсто, S&P 500 порасна за скромни 0,01 отсто, а Nasdaq за 0,39 отсто.

По 15 месеци, ФЕД „ја нагази топката“ и ги задржа каматните стапки во опсег меѓу пет и 5,25 отсто во јуни. Но, американската централна банка многу децидно посочи дека до крајот на годината нема да има намалување на каматната стапка, туку сосема спротивно.

„Мислам дека воопшто не е соодветно да се размислува за тоа. Инфлацијата не падна, таа не реагираше многу на нашите досегашни зголемувања на каматните стапки. Ќе мора да продолжиме“, рече претседателот на ФЕД, Џером Пауел.

Европските берзи ги заклучија канцелариите пред да биде објавена одлуката на ФЕД, а во исчекување на сценариото што навистина се случи, сите беа обземени од оптимизам. Индексот Stoxx Europe 600 порасна за 0,45 отсто, германскиот DAX за 0,56 отсто, францускиот CAC 40 за 0,58 отсто, а британскиот FTSE 100 за 0,10 отсто.

Доларот падна за 0,2 отсто, а еврото порасна за 0,3 отсто, на 1,0825 долари. Британската фунта исто така порасна, за 0,4 отсто, на 1,2659 долари.

Биткоинот стагнира на 25.869 долари, а етерот падна за 0,6 отсто, на 1.728 долари.

Приносите на американската 10-годишна обврзница паднаа за еден базичен поен, на 3,8 отсто, на британската се намалија за четири базични поени, на 4,39 отсто, а германската порасна за три базични поени, на 2,45 отсто.

Цената на фјучерсите на сурова нафта вест тексас интермедиејт (ВТИ) падна за 0,9 отсто, на 68,79 долари за барел, додека цената на златото стагнира.

Во моментов нема коментари за веста. Биди прв да коментира...

Остави коментар