Кинеската криза ги собори обврзниците на најлошо ниво годинава

Корпоративните обврзници низ светот веројатно ќе забележат една од најлошите недели во годината, со пад на цените поради ескалацијата на станбената криза во Кина и зголемениот број банкроти во САД. Понатаму, се чини дека Федералните резерви (Фед) планираат да продолжат да ги зголемуваат каматните стапки.

Премиите за принос на азиските обврзници од инвестициска класа (деноминирани во долари) се зголемија за повеќе од 10 базични поени оваа недела, што е најбрзиот пораст од превирањата во американскиот банкарски сектор во март. На глобално ниво, корпоративните обврзници изгубија околу еден процент од својата вредност од почетокот на неделата на основа на вкупен принос, и се движат кон својата најлоша недела од мај, според глобалниот индекс на корпоративни обврзници на „Блумберг“.

Почетокот на продажбата на обврзниците неделава беше знак за проширување на проблемите во кинескиот сектор за недвижности, каде што е неизвесно дали приватната градежна фирма „Евергранде“ (Evergrande) ќе може да ги намири заостанатите долгови, а други слични државни компании предупредуваат дека и тие трпат загуби. На расположението на инвеститорите влијаеја и пораките од Фед за можно зголемување на каматните стапки, како и зголемување на бројот на банкроти.

Трошоците за осигурување од неисполнување на обврските за висококвалитетните издавачи во Азија (со исклучок на Јапонија) се зголемија за дополнителни два базични поена во петокот. Индексот што ги мери тие трошоци го забележа седмиот последователен ден на раст, најдолга низа од март. Ако сегашните нивоа се задржат, индексот ќе се зголеми за околу 33 базични поени неделава, што е најголем скок во последните 11 месеци.

Во Северна Америка, CDS, индексот што ги следи издавачите oд шпекулативна класа, веројатно ќе го забележи својот најголем скок на трошоците во последните осум недели, според посебен индекс на „Маркит“ (Markit). Кредитните стратези во „Голдман Сакс“, меѓу кои и Лотфи Каруи, во извештајот од четвртокот напишаа дека имплицираните вредности на ненамирените американски обврзници со висок принос, како и оние со кои се тргува со потпора, веќе ја надминуваат вкупната вредност од 2022 година.

Во моментов нема коментари за веста. Биди прв да коментира...

Остави коментар