Продолжува падот на Македонската берза

Просечниот дневен број на трансакции на Македонската берза се сведе на 30 во август годинава, што е намалување за 18,9 проценти во однос на претходниот месец кога во просек дневно имало 37 трансакции, покажуваат податоците од новиот берзански билтен.

Пад има и кај просечниот дневен промет и тоа од 7,2 милиони денари (118.000 евра) на околу шест милиони денари (98.000 евра), што е намалување за 16,8 проценти.  Во август има намалување во класичното тргување за 16,8 проценти во однос на претходниот месец, а во тргувањето со акции има пад од 17,5 проценти.

Всушност единствени две светли точки кај берзанските показатели за август се тргувањето преку блок-трансакции кадешто има раст од 55,3 проценти и во тргувањето со обврзници кадешто има раст од 49,1 проценти.

Инаку, меѓу петте најтргувани во август се акциите на „Комерцијална банка“, „Алкалоид“, „Макпетрол“, „НЛБ Банка“ и „Стопанска банка Скопје“. Во вкупниот промет на берзата во август трансакциите со акциите на „Комерцијална банка“ учествуваат со 41,4 проценти, а акциите на „Алкалоид“ со 30,2 проценти.

Најголем раст на вредноста од 15,7 проценти во август имаше акцијата на „ОКТА“, а најголемо опаѓање од 12,6 проценти имаше акцијата на „Стопанска банка Скопје“.