Изјавата на претседателот на Федералните резерви (Фед), Џером Пауел, дека американската централна банка најверојатно нема да ги намали каматните стапки во март ги потресе американските и азиските пазари.
Тоа што го прави тушот уште постуден за инвеститорите е фактот што интервјуто на Пауел (емитувано во неделата на Си-би-ес) беше снимено пред објавувањето на податоците за работните места во петокот, кои покажаа дека платите во САД силно пораснале во јануари.
Азиските пазари на обврзници потонаа во понеделникот, при што приносите на државниот долг на Австралија и во Нов Зеланд скокнаа околу 10 базични поени. Од друга страна, приносите на кинеските државни обврзници паднаа за околу два базични поена.
Азиските акции и фјучерсите на американските акции потонаа, додека јапонските берзи пораснаа.
Доларот зајакна, додека јенот и еврото малку паднаа.
Колку потона оптимизмот кај инвеститорите покажува и фактот што очекувањата дека каматите ќе паднат во март се спуштија од 40 на 20 отсто.
„И покрај сегашниот песимизам, пазарот сè уште очекува пет намалувања на каматните стапки годинава. Претставниците на Фед најверојатно ќе продолжат да се спротивставуваат на ваквите големи намалувања“, рече Ед Јардени, претседател на „Јардени рисрч“ (Yardeni Research).
Цената на нафтата стагнираше по американските и британските напади врз Хутите во текот на викендот. ВТИ се стабилизира по минатонеделниот пад од 7,4 отсто, а златото падна малку, на околу 2.037 долари за унца.
.webp){kind=icon}
