Nasdaq надмина 17.000 поени благодарение на „Енвидија“

Американските акции во вторникот завршија мешано, а технолошкиот берзански индекс Nasdaq имаше убедливо најдобри перформанси, благодарение на „Енвидија“ (Nvidia).

Индексот S&P 500 го заврши тргувањето со раст од 0,02 отсто, индексот DJIA падна за 0,55 отсто или за повеќе од 200 поени, додека индексот Nasdaq 100 оствари раст од 0,59 отсто и надмина 17.000 поени.

Неодамна објавената заработка на „Енвидија“ ги надмина очекувањата и додаде дополнителен ветер зад компаниите што се занимаваат со вештачка интелигенција. Овој производител на чипови тројно го зголеми профитот во првиот квартал, на 26 милијарди долари, што влијаеше на растот на неговите акции. 

Во вторникот акциите на „Енвидија“ дополнително напредуваа откако Илон Маск објави дека неговиот стартап со вештачка интелигенција „Екс еј-ај“ (xAI) - кој собра 6 милијарди долари - ќе го користи хардверот за графичка обработка H100 на производителот на чипови.

Цената на нафтата брент скокна во вторникот од 81 на 84,5 долари за барел по новите тензии на Блискиот Исток. Уште еден брод беше нападнат во Црвено Море, додека израелските тенкови стигнаа до центарот на Рафа.

Европските акции потонаа. Индексот Euro Stoxx 600, кој го следи работењето на 600 најголеми компании во 17 европски земји, го заврши тргувањето со пад од 0,60 отсто, германскиот DAX падна за 0,52 отсто, лондонскиот берзански индекс FTSE падна за 0,76 отсто, додека падот на францускиот CAC изнесува 0,92 отсто.

На падот на европските и акциите на индексот DJIA влијаеја и коментарите на претседателот на Федералните резерви на Минеаполис, Нил Кашкари, кој рече дека би сакал да види повеќе податоци во наредните месеци што укажуваат на ублажување на инфлацијата пред да ги намали стапките. Тој посочи и дека не исклучува дополнително зголемување на каматите доколку повторно се зголемат ценовните притисоци.

Во моментов нема коментари за веста. Биди прв да коментира...

Остави коментар