„Енвидија“ ги надмина очекувањата зголемувајќи ги приходите за повеќе од трипати

„Енвидија“ (Nvidia Corp.), производителот на чипови во центарот на бумот на вештачката интелигенција (ВИ), зајакна во доцното тргување откако зголемената прогноза за продажбите покажа дека трошењето за компјутерска вештачка интелигенција останува силно.

Приходите во вториот квартал ќе бидат околу 28 милијарди долари, соопшти компанијата во средата, надминувајќи ги 26,8 милијарди долари предвидени од аналитичарите. Резултатите од фискалниот прв квартал, кој заврши на 28 април, исто така ги надминаа проекциите - зголемени со растот во одделот за центри за податоци на „Енвидија“.

Големото прашање што се однесуваше на извештајот за заработка беше дали најновите бројки на компанијата би можеле да го оправдаат вртоглавиот пораст на акциите. Акциите годинава добија 92 отсто до затворањето во средата, поттикнати од надежите на инвеститорите дека компанијата ќе продолжи да ги урива очекувањата.

Извештајот не разочара, а главниот извршен директор Џенсен Хуанг ја поттикна возбудата зборувајќи за почетокот на нова ера. „Ова е почеток на нова индустриска револуција“, рече тој во едно интервју, повторувајќи една од неговите омилени теми. „Ова е навистина возбудливо“.

Оптимистичката перспектива го зајакнува статусот на „Енвидија“ како најголем профитер во сферата на вештачката интелигенција. Таканаречените акцелератори на вештачката интелигенција на компанијата - чипови што им помагаат на центрите за податоци да развиваат четботови и други врвни алатки - станаа жешка стока во последните две години, зголемувајќи ја нејзината продажба. Пазарната вредност на „Енвидија“ исто така вртоглаво порасна, надминувајќи 2,3 трилиони долари.

 Џенсен Хуанг Bloomberg

Во фискалниот прв квартал приходите на „Енвидија“ се зголемија за повеќе од тројно, на 26 милијарди долари. Со исклучок на одредени ставки, добивката беше 6,12 долари по акција. Аналитичарите предвидуваа продажба од околу 24,7 милијарди долари и заработка од 5,65 долари по акција.

Акциите пораснаа дури за 7,8 отсто во продолженото тргување во средата, со што за првпат се над 1.000 долари. Компанијата со седиште во Санта Клара, Калифорнија, исто така објави поделба на акциите 10 за 1 и ја зголеми својата квартална дивиденда за 150 отсто до 10 центи по акција.

Растот помогна да се подигнат акциите на другите компании поврзани со вештачката интелигенција. СМЦ (Super Micro Computer Inc.), АМД (Advanced Micro Devices Inc.) и „Дел“ (Dell Technologies Inc.) сите профитираа поради резултатите.

Засега, голем дел од овие нови приходи доаѓаат од мал број клиенти. Група од четири компании - „Амазон“ (Amazon.com Inc.), „Мета“ (Meta Platforms Inc.), „Мајкрософт“ (Microsoft Corp.) и „Гугл“ (Alphabet Inc) - се најголемите купувачи на „Енвидија“, на кои отпаѓаат околу 40 отсто од продажбата. Хуанг (61) се обидува да ги прошири облозите со производство на целосни компјутери, софтвер и услуги - чија цел е да им помогне на повеќе корпорации и владини агенции да распоредат свои системи за вештачка интелигенција.

Одделот за центри за податоци на „Енвидија“ - сега убедливо нејзиниот најголем извор на продажба - генерира приход од 22,6 милијарди долари минатиот квартал. Чиповите за игри обезбедија 2,6 милијарди долари. Аналитичарите поставија цели од 21 милијарда долари за единицата на центарот за податоци и 2,6 милијарди долари за игрите.

Ако растот на акциите по работното време се одржи во редовното тргување в четврток, „Енвидија“ ќе додаде приближно 140 милијарди долари на својата процена. Тоа е повеќе од целата пазарна капитализација на „Интел“ (Intel Corp.), производител на чипови што некогаш ја засенуваше „Енвидија“ по секоја ставка. И проектираните квартални продажби на „Енвидија“ од 28 милијарди долари би биле над двојно повеќе од она што се очекува да го пријави „Интел“.

„Енвидија“ во средата нагласи дека сака да ја продаде својата технологија на поширок пазар - проширувајќи се надвор од гигантските провајдери. Хуанг рече дека вештачката интелигенција се движи кон потрошувачки интернет-компании, производители на автомобили, биотехнологија и клиенти од сферата на здравствената заштита. Земјите исто така развиваат свои системи - тренд познат како суверена вештачка интелигенција.

„Овие можности создаваат повеќе пазари од милијарди долари надвор од давателите на услуги во облак“, рече тој.